PHULLEN DIARY 2021
PHULLEN DIARY 2021
Buatsaihtu : Buata Bawihtlung
Ni 1.1.2021 Zirtawpni
Kumthar ni a ni a, Covid-19 hrilengin khawvel a tibuai mek a. Kumthar pawh hi kum dang angin a lawm theih loh a. Kohhran inkhawm a awm the
i lo va, ruai nena kumthar lawm pawh a awm thei lo a ni. Hetiang hun hi Phullen khawtlangah a la thleng ngai lo hial awm e.
Ni 10.1.2021 Pathianni:
Hemi ni hian Covid-19 hri leng avanga khawtlang enkawltu pawl Village Level Task Force (VLTF) Phullen chu inhmukhawmin, hetiang hian hruaitu siam rem a ni.
Chairman : Pu Vanzairemmawia
Vice Chairman : Pu Lalruatsanga Pautu
Secretary : Pu PC. Malsawmhlua
Asst. Secretary : Pu Lalhruaikima Tochhong
Treasurer : Pu Lalhmingliana
Fin. Secretary : Pu Biakchungnunga
Phullen Branch YMA Executive Committee Member zawng zawngte VLTF Committee Member atan ruat an nih bakah Kohhran leh pawl hrang hrang aiawhte ruat an ni bawk.
Ni 11.1.2021 Thawhtanni:
January ni 11, 2021 chhun hian Phullen Diakkawn tawntirha Motor Kawngpui pawimawh tak, Lei tlahniam vanga tlabal chu Motor kaltlang theihin sial leh a ni. He kawng sial thar hi, Motor kawngpui thin chhak lam, Lei tawlh sawp karah mamawh zual phuhru tura siam lailawk a ni.
Ni 19.1.2021 Thawhlehni
January ni 19, 2021 chhun hian, Phullen Village Council tharte chuan a vawi khat nan a huhovin Aizawla sawrkar office pawimawh hrang hrang an dawr kual. VC te hian mawhphurhna an lak hnuah Covid-19 hrileng avangin an zin chhuak mai thei lo va. Ni 18.1.2021 khan member zawng zawng Aizawl-ah kalin, Ni 19.1.2021 hian office hrang hrang an dawr a, Tuikhuahtlangah zanriah an eiho.
Ni 1.2.2021 Thawhtanni
February ni 1, 2021 zan hian VCP Pu Vanzairemmawia kaihhruainain Creche Centre, Diakkawn-ah MHIP Phullen Branch Hruaitu 2021 thlan a ni a. Hengte hi thlan chhuahte an ni-
President : Pi H.Lalsawmliani
Vice President : Pi Lalneihsangi
Secretary : Nl.Lalhmachhuani Pautu
Asst. Secretary : Pi B.Lalnunhlimi
Treasurer : Pi Zoramengi
Fin. Secretary : Pi B.Lalthlengkimi
Ni 6.2.2021 Inrinni:
Covid-19 avanga hun rei tak inkhawm a theih loh hnuah, Ni 6.2.2021 atang hian Inrinni chhun leh Pathianni chhunah Pathian biak inkhawm tan leh a ni. Inkhawmnaah hian zai lo tur leh Sunday school pawh pulpit atanga khaikhawm thin tura tih a ni bakah, inkhawm tur chuan hmui tuamna (facemark) vuah vek tura tih a ni.
Ni 6.2.2021 Inrinni
February ni 6, 2021 hian Phullen GSA team leh Keifang Team te chu Keifang Football ground, Phullem (grass) phah tharah Football friendly match an khel. Phullen atangin team hnih an kal a, Phullen GSA Team Blue 4-1 in Keifang Mel Veng FC an hneh a, Phullen GSA Team Grey chuan 3-2 in Keifang FC an hneh bawk.
Ni 7.2.2021 Pathianni:
February ni 7, 2021 Pathianni chawhnu dar 3:00 pm hian Phullen khawtlanga Ramvak mi leh Sava veh thin leh Silai nei te chu Community Hall-ah Branch YMA Committee-te nen inhmuhkhawmna hun an hmang a. Ramsa leh nungchate hmumhalh dan tur chungchang an sawiho.
Ni 17.2.2021 Nilaini:
Hemi ni, zan dar 8:00 PM khan Tv.Vanlalchhuanawma (Chhuantea), kum 18, Pu R. Lalbiaknunga leh Pi Lalthanzauvi te fapa, Farkawn veng chu Brain Tumor avangin, Medica Hospital Kolkata-ah a thi. A ruang hi Lengpui Airport thleng Thlawhtheihna a phurh niin Lengpui atangin motor-a hawpui leh a ni a. Ni 18.2.2021 Ningani zan 10:00 pm ah Phullen thlenpui a ni a, a tuk Ni 19.2.2021 Zirtawpni-ah Phullenah vui a ni.
Ni 1.3.2021 Thawhtanni:
Covid-19 hrileng a ziaawm deuh a, Mizoram sawrkar thuchhuak angin, hemi ni atang hian Zirna sikul a pawl 5 chin chunglamte chu sikul an kal tan leh. Sikul naupang, sikul kai turte chuan mahni nu leh pate hnen atangin sikul kal remtihna lehkha keng vek tura tih an ni.
Ni 4.3.2021 Ningani:
March ni 4, Ningani zing khawvar hma, dar 2:20 am khan Pu Bawihchhawna Kum 89, F/o Pu Tlangliankhuma, Mautui veng chu nat lawkna em em awm lovin a thi a. Hemi ni chawhnu dar 1:00 pm hian vui a ni.
Ni 6.3.2021 Inrinni
March ni 6, Inrinni chhun khan, Phullen VC hnuaia kum 2021 chhunga Lo nei turten Lo an hal. Kum 2021 atana Phullen khawtlangin Lo tura ram a theh chin chu - AIKAWN lam, TUIHNEM chung, MINPUIRUAM leh DENGSUR ram te a ni
Ni 6.3.2021 Inrinni:
March ni 6, Inrinni hian Chapchar Kut puala GSA Phullen-in Football Tournament a huaihawt chu final khelh a ni a, Lenkhawpui FC an champion. He tournament hi ni 5.3.2021 atanga tan niin Football team 5 te an inel a ni.
Ni 25.3.2021 Ningani:
Tuivawl - Phullen inkar kawng chei that (resurfacing) hna thawh mekah tualchhung kawng – Diakkawn etc pawh pawh khawtlang hruaitute beiseina angin tha taka siam a ni.
Ni 30.3.2021 Thawhlehni
Hemi ni hian Mizoram sorkar Council of Minister thutlukna angin Phullen chu Notified Town a nih thu UD&PA chuan thuchhuah a siam.
Ni 1.4.2021 Ningani:
Covid-19 avangin hun rei tak Sikul kai dan a mumal lo va, hemi ni hian sawrkar thuchhuak angin Primary school – class III leh class IV ten sikul an lut tan ve leh a. Sikul kal turten nu leh pate remtihna lehkha keng theuh tura tih an ni.
Ni 5.4.2021 Thawhtanni:
Hemi ni hian Phullen khuaa Lo nei zawng zawng te, In tin atanga mi 1 thawk chhuakin, Fehkawng an rit fai.
Ni 9.4.2021 Zirtawpni
April ni 9, 2021 Zirtawpni zan dar 9:35 khan Pu Rinsailova (L) nu Pi Dahnuni, kum 95, Phullen Field veng chuan an chenna Inah chatuanram min pansan ta. Pi Darhnuni ruang hi zanah lumen a ni a. Sawrkarin Covid-19 hri leng laka fimkhurna a kalpui dan angina Lumennaah hian zai loh a ni.
Ni 12.4.2021 Thawhtanni:
Sawrkar thu chhuak thar angin Covid-19 laka fimkhur a ngaih zual avangin tual chhunga Sikul te chu April ni 12 Thawhtanni atang hian khar leh lailawk a ni.
Ni 14.4.2021 Nilaini:
Phullen khaw chhunga sawrkar officer lu ber BDO (Phullen RD Block) thar Pu Benjamin Zalawma MCS chuan a mawhphurhna lain April ni 14 Nilaini hian Phullen lo thlenga. Phullen a lo thlen hlim hian Phullen khawtlang hruaitu VC ten an lo dawngsawng a ni.
Ni 14.4.2021 Nilaini
April ni 14, 2021 zan dar 7:30 hian Phullen Br YMA office, Diakkawn-ah Lt Col Rtd Lalhmingthanga (Pu Hminga) hovin India Sipaia ṭang duh te pualin inkawmhona hun hman a ni a. He hunah hian Sipaia ṭang duh thalaite bakah mahni fate leh naute Sipaia luh tir duh mi engemaw zat an kal a. Phullen khaw chhuak Pu Hmiga hian, Sipai ṭan tum te hriat duh, zawhna hrang hrang bakah, an hriat tur tul leh pawimawh tak tak te a lo hrilhfiah a ni.
Ni 1.5.2021 Inrinni
May ni 1, 2021 Inrinni khan Phullen Village Level Local Task Force (VLTF) chuan, Covid-19 hrileng chungchangah hetiang hian thuchhuah an siam –
Phullen Khawtlangah Covid-19 Positive First Contact kan awm avangin, Rapid Antigen Test hmangin 1st May 2021 Inrinni zan khan mi pathum (3) te, an Swap sample test nghal a ni a, an vaiin Negative result an nei vek a ni. Heng mite hi 4th May, 2021 Thawhlehni-ah TrueNat Laboratory hmanga test leh tur an ni. TrueNat test result kan hriat hma chu hetiang hian Phullen khawtlanga kan inkaihhruaina kalpui tur a ni ang:
Phullen khawchhunga Possitive 1st Contact ni a rinhlelh zawng zawng chhungkua te Home Quarantine tura tih an ni.
TrueNat Test result kan hriat hma chu, Phullen khawchhungah VLTF hriatpuina lo chuan tumah pawn chhuak lo turin kan inhriattir a ni.
Phullen khawchhunga Dawr nei te, tumah Dawr hawng hrih lo turin kan inhriattirin kan inngen a ni.
Damdawi dawr te chu, Emergency leh ṭul bik thilah chauh hawn phalsak an ni.
Mipui intur Tui chawi tur ten VLTF hriatpuina leh phalna an la hmasa tur a ni.
Lohtheihloh avanga pawn chhuah ngai kan awm pawhin Face Mask vuah ngei ngei turin kan inhriattir a ni.
He inkaihhruaina dan hi khawtlang leh chhungkua, mitinte himtlang taka kan awm theih nana tih a ni a. He kaihhruaina hi zawm ṭheuh turin khawtlang mipui te kan inngenin kan inhriattir a ni.
Ni 1.5.2021 Inrinni:
Phullen khawchhungah Covid-19 vei (Positive) kan awm palh ve thei a, chutiang a ni pawhin hmunpui lam pan kher lova khawtuala inekawna tur Community Covid Care Centre (4C) chu siam a ni. He 4C hmun atan hian Gov’t Phullen MS-I chu ruahman niin, Phullen PHC enkawlna hnuaia awm tura ruahman a ni.
Ni 1.5.2021 Inrinni:
May ni 1, 2021 Inrinni hian MRB Phullen Branch chu Branch tenau (Scale-I) atangin Branch sang zawk (Scale-II Branch) ah hlan kai a ni. MRB Phullen Branch hian hma a sawn chak hle. Scale-II Branch hian thawktu tam zawk – Manager, Asst Manager, Cashier-2 bakah loan pek theih tam zawk te leh pawisa kawl theih tam zawk a keng tel a ni.
Ni 1.5.2021 Inrinni:
Covid-19 hri kai awmna Lungpher khua atanga zin haw Phullenah an awm avangin khawtlang a ralkhel ang reng hle a. May ni 1, 2021 Inrinni zan atang hian khawtlang mipui tumah pawn chhuak lo tur leh inkharkhip tlat turin VLTF ten thu an chhuah a. Hemi ni hian Lungpher a zin mi 3 te chu Covid-19 an vei leh vei loh RAgT hmanga enfiah (test) a ni a, vanneih thlak takin heng mite hian Covid-19 an lo kai lo hlauh a ni.
Ni 4.5.2021 Thawhlehni:
Phullen tui lak (Tuivawl Pump) siam hna thawktu JDSS engineer pakhat chu Covid-19 vei rinhlelhawm a nih avangin Aizawl-ah kalin a inenfiah tir a. Covid-19 a lo kai ngei tih hriat chhuah a ni a. Phullen-a a kaihhnawih hnaivai mi 30 te chu RAgT hmangin enfiah ve nghal niin mi pahnih ten Covid-19 an kai tih finfiah a ni a. Anni hi Phullen khaw chhunga Covid-19 kai hmasa bera chhal an ni a, chu mite chu:
Pu Abu Turap JDSS Phullen
Pi Lalramhmuaki Phullen
Ni 05.05.2021 Nilaini:
Covid-19 hriin Phullen khawtlang a luhchilh ve tak avangin mipui an chiai angreng hle a. Hemi zan dar 7:30 hian Phullen VLTF kaihhruainain khawtlang huap tawngtai rualna neih a ni a. He hun hi Information Mike kaltlangin Lieutenant VL.Chhanchhuahi C.O. Salvation Army Phullen Corps chuan a kaihruai.
Ni 8.5.2021 Inrinni
May ni 8, 2021 Inrinni hian Phullena Covid-19 hri veite kaihhnawih hnai vai zual (Contact Primary High Risk) te chu RAgT hmangin tum hnih enfiana neih a ni a. Mi 26 te enfiahna atangin mi 5 ten Covid-19 an kai tih finfiah a ni a. Hemi zan hian midang enfiah leh a ni a, chuta tang chuan mi 1 (JDSS Driver) chuan Covid-19 a kai tih finfiah leh a ni bawk. Tichuan, hemi ni hian Phullenah Covid-19 kai thar mi 6 hmuh chhuah an ni a, hei hian Phullen khawtlang pawh a nghawng hle. Hemi ni a covid-19 vei hriat chhuah tarte chu –
H. Lalhruaikima Diakkawn, Phullen
Lalramnghaka JDSS, Phullen
Malsawmtluanga JDSS, Phullen
Romuanpuia Khiangte JDSS, Phullen
Vanlalmawipuii Mautui veng, Phullen
Liana Driver JDSS, Phullen
Ni 8.5.2021 Inrinni
May ni 8, 2021 thleng hian Phullen-ah Covid-19 hri vei leh vei lo enfiahna (Test) paltlang tawhte chu mi 85 an tling ta a. Heng atang hian, mi 8 in Covid-19 hi an vei tih hmuhchhuah a ni tawh a. In lama lo inkhung rih tura tih (Home Quarantine) mi 65 an awm mek bawk.
Heng avang hian Saitual District Magistrate cum Saitual DC Pu VL Hruaizela Khiangte chuan hemi ni, ni 8.5.2021 atanga thu leh awm hma chuan Phullen chu Containment Zone-ah a puang a. Khaw dang atangin tlawhpawh phal loh a ni a, Phullen atanga khaw danga zin chhuah pawh phal loh a ni.
Ni 9.5.2021 Pathianni
May ni 9, 2021 Pathianni hian, Covid-19 kaihhnawih mi 28 te chu RAgT hmangin enfiah an ni a, vanneih thlak takin hemi tuma enfiahte hi Covid-19 kai tumah an awm lo va. Hei hian khawtlang boruak rit pawh a tiziaawm deuh.
Ni 11.05.2021 Thawhlehni
Hemi ni hian Phullena Covid-19 vei kaihhnawih mi 56 (39 TrueNat + 17 RAgT) te enfiah leh an ni a. TrueNat hmanga enfiahte atangin covid-19 kai mi 3 hmuh thar a ni a, RAgT a enfiahte erawh hrikai an awm lo a ni. Hemi ni a Covid-19 vei hmuh chhuah tharte chu:
Upa J. Ngurchhawna Diakkawn, Phullen
Henry Lalmuanzova Driver, JDSS, Phullen
Vanlalhmangaihzuali Khalthang Ar Farm veng, Phullen
Ni 14.2021 Zirtawpni
May ni 14, 2021 Zirtawpni chawhnu dar 1:50 khan Pu R. Laldawla, kum 92, Phullen Farkawn veng chu an Phullenah a thi a, a thih chhan hi Awmlai tih a ni. Pu Laldawla hi Pi Laiveti pasal niin Health Dept-ah Health Worker hna thawk thin a ni. Hri len laia Sawrkar inkaihhruaina SOP zawm chungin a ruang hi Lumen a ni a, a tuk 15.5.2021 zing dar 7:00 ah vui a ni.
Ni 15.6.2021 Thawhlehni
June ni 15, 2021 hi YMA Day a ni a, Covid - 19 hri leng avangin YMA Day hi Member pum huapa hman theih a ni lo va. Kawng hrang hrangin midang tan YMA chu luangchhuakin, tun hnaia Phullen khaw mi HSLC 1st Division a Pass te Lawmpuina pawisa an hlan a, Phullen Damdawiin (PHC) ah C.Poor Fund pualin pawisa an dah a, Covid-19 vei mek tanpuina an pe a, YMA ram leh Lal Awksarala Lungdawh leh Thangteeka Lungdawh te an tifai a ni.
Ni 21.6.2021 Thawhtanni
June ni 21, 2021 Thawhlehni zinglam dar 12:10 AM khan Upa J.Ngurchhawna kum 85 h/o Pi Lalrinkimi, Phullen Diakkawn chu, Covid-19 vangin ZMC Falkawn-ah a boral. Upa J. Ngurchhawna hi May ni 11, 2021 khan Covid-19 a kai tih hriat a ni a. Hemi zan atang hian Phullen 4C ah enkawl nghal a ni a. Thawk lamah harsatna a neih deuh avangin May ni 17, 2021 khan Phullen 4C atangin Covid-19 enkawlna hmunpui ZMC Falkawn-ah refer a ni a. Phullen atanga Covid-19 kai hmunpui lama enkawl tura kaltir (refer) hmasak ber a nih bakah Phullen khaw mi Covid-19 avanga thi hmasa ber a ni bawk. Hemi tuk hian Phullen-ah hawpui nghal niin, dar 11:00 AM-ah Biak Inah vui a ni.
Ni 6.7.2021 Nilaini
July Ni 6.2021 Nilaini hi M.H.I.P Day a ni a. He hun hi Phullen Branch MHIP chuan zingkarah Faina hnatlang te neiin, tanpui ngai te tanpuina thilpek an hlan a ni.
Ni 9.7.2021 Zirtawpni
July ni 9, 2021 Zirtapwni zing dar 5:30 AM khan Pi Aithangpuii, kum 80, w/o B.Ngurchhawna (L), Phullen Bethel veng chu an chenna in Phullen Bethleh vengah a thi. Pi Aithangpuii hi hun engemaw chen ruhsehpui leh tar chak lo avangin inah a bawksawp tawh a. A ruang hi hemi ni chhun dar 12:00 ah vui a ni.
Ni 17.7.2021
Covid-19 hripui leng kal zel avangin Lentlang Chanchinbu pawh hun engemaw chen tih chhuah theih loh a nih hnuah, PDF File hmangin tih chhuah leh a ni ta.
Ni 15.7.2021 Ningani
July ni 15, 2021 hian YMA Chawngbawla section hmalaknain an Section huam chhung a mi harsa, Tv. Kapmawia, Phullen Mautui veng te chenna in chu hnatlangin an sak zauh (exten) sak. He hnatlangah hian mi 70 vel an thawk chhuak a ni.
Ni 23.7.2021 Zirtawpni
July ni 23, 2021 Zirtawp zan khan Phullen Khaw chhunga zirna Sikul awmte atanga Board Exam hmachhawn te zinga titha zirlai naupang pathum (3) te hnenah Thanzauva leh Biakzuali Award 2021 hlan a ni. He Award hi zirlaite chophurna atan YMA leh Pu Thanzauva leh Pi Biakzuali te faten an siam a ni a. Chawimawina Award atan hian, Citation leh Pawisa fai - HSSLC - ₹ 10000/- leh HSLC- ₹ 7000/- hlan a ni a. Senso zawng zawng hi Pu Lt Col Lalhmingthanga ten an tum a ni.
Chawimawina Dawngtute :
R.Lalhriatzuali D/o R.Lalhmunsanga (HSSLC - PHSS)
Vanlalremruatpuii D/o Lalzikpuia (HSLC - GNHS)
Lalrimawii D/o Lalropuia (HSLC- PES.PLVT)
Ni 2.8.2021 Thawhtanni
Phullen khawtlangin Dry village kan kalpui zel theihna tura hmalatu Joint Prohibition Committee (JPC) Phullen chuan August ni 2, 2021 Thawhtanni khan General Body meeting a nei a. He hunah hian JPC hruaitu thar leh hruaitu kalchhuak ten mawhphurhna an inhlan a. Ruihhlo do kawnga Khawtlang Dan kenkawh laite ennawnin, siam that ngai laite siam that a ni. Kum 2021-2022 chhunga JPC Phullen hruaitu turte chu:
Chairman : Pu Lalzikpuia
Vice Chairman : Upa Vanlalnunga
Secretary : Pu J. Lalhlanthara
Asst. Secretary : Pu Lalhmingthanga
Treasurer : Pu Lalnunthara
Fin Secretary : Pu Lalhmingliana
Information secretaries:
1. Pu Lalramngaia
2. Pu. Bt Lalhruaitluanga
Ni 6.8.2021 Zirtawpni
September 2021 chhung ngeia Phullen khua chu Digital/Smart Village a siam tura hmalakna atan Meeting thawhkhatna chu August ni 6, 2021 Zirtawpni chawhnu dar 1:00 khan BDO Chamber-ah BDO Benjamin Zalawma Ralte kaihhruaina hnuaiah neih a ni. He hunah hian VC aiawh te, Voluntary organization aiawhte leh officials engemaw zat an tel. Digital/Smart Village in a kentel turte:
Chhungkaw tinah ATM Card neih ngei a ngai.
Dawr tin leh Sawrkar Office leh Bill-pekna hnunah Sulhnu Application (QR Code) siam
B.C. Point (Mini ATM) Phullen khaw chhung tan ruahmanna siam.
Bank Account hawng vek tura hmalak.
Ni 14.8.2021 Inrinni:
VC ten 15th Finance Commission hnuai atanga an siam, Sahlam kawng chu Ni 14.8.2021 Inrinni khan PCC in chhun zawh a ni.
Ni 15.8.2021 Pathianni:
August ni 15, 2021 Pathianni zing dar 7:30 khan India Independence Day vawi 75-na chu BDO office tual zawl, Phullen-ah urhsun taka lawm a ni. Independence Day lawmna hi Hripui len lai a nih avangin kum dang anga hman a remchang lo va. BDO Pu Benjamin Zalawma Ralte chuan India Hnam puanzar a pawt pharh a, sawm bik mi pawimawh tak takte an tel a ni.
Dt 16.8.2021 Thawhtanni:
Saitual DC thupek angin August ni 16, 2021 Thawhtanni atang hian High School chin chunglam zirna School te hawn leh a ni. School hi kar khatah ni 3 hawn phal a ni a, VLTF leh School thuneitute ruahmanna anga kal tur a ni a, Elementary lam chu la kal hrih loh tur a ni.
Ni 29.8.2021 Pathianni:
Hri leng avanga engemaw chen Kohhran inkhawm a theih loh hnuah, Sawrkar (Saitual D.C) in phalna a tihchhuah angin August ni 29, 2021 Pathianni atang hian chhun lamah Kohhran inkhawm neih tan leh a ni a. Fimkhur thuah Biak Ina leng zat zahve (50% seat capacity) emaw mi 200 aia tam lo emaw bak inkhawm phal a ni lo va. SOP zawm chungin, inkhawmnaah zai phal a ni lo va, AMC area atang zin haw te leh covid-19 natna lanchhuah dan ang chi (symptom) neite chu inkhawm phal loh a ni bawk. Zan lamah chuan curfew chhunzawm niin, inkhawm phal loh a ni bawk.
Ni 30.8.2021 Thawhtanni
August ni 30, 2021 Thawhtanni hian lo nei zawng zawng ten fehkawng an tit fai. Hei hi kum tina tih thin dan a ni a, harsatna sawi lova kal lo te chu run tura tih a ni.
Ni 1.9.2021 Nilaini
Mizoram Sawrkar chuan National HSS Phullen chu Pawl 12 Science zir theihna turin a ruahman a. September ni 1, 2021 Nilaini khan State Project Director, Samagra Shiksha, Mizoram (Mizoram School Education Society) chuan thu chhuah siamin, Samagra Shiksha hnuaiah National HSS Phullen a Senior Secondary Lecturer hna thawk tur Zirtirtu pasarih (7) a la thar. Zirtirtu lak tharte hi Master degree nei vek niin Science lam zirtirtu panga (5) bakah Mizo (1) leh English (1) zirtirtu te an ni a, Order chhuah atanga ni 15 ral hmain an hna hi zawm tura hriattir nghal an ni. Hei hi Phullena pawl 12 Science zir theihna hmasa ber a ni.
Ni 8.9.2021 Nilaini:
September ni 8, 2021 Nilaini atang hian Phullen-ah Mini ATM chu hman theihin a awm ve ta. Hei hi RNFI Service Private Limited hnuaia mi niin Tv. David Lalrinchhana Dawr, Diakkawnah bun a ni. ATM hmanga pawisa lakchhuah bakah, pawisa thawn a tih theih a ni. Hei hi Phullena ATM / Mini ATM awm hmasa ber a ni.
Ni 18.9.2021 Inrinni:
Phullen Kannan veng kawng (Tawmkuk kawng), XV- Finance Commission hnuaia, PCC hmanga Phullen VC-in a siam chu, an siam chin ang an zo fel ta. He kawng PCC hmanga siam tawh thui zawng hi hi 240 Mtrs a thui niin, Feet 8 leh Feet 9 a zauva siam a ni.
Ni 20.9.2021 Thawhtanni:
September ni 20, 2021 atang hian hmun dang atanga Phullena haw te, darkar 24 chhunga Covid-19 test, Negative Result neite chu Quarantine tawh loh tura VLTF Phullen-in a rel chu a taka kalpui tan a ni. Hetih lai hian in test lova lo haw ru a awm theih avangin, Phullena haw tur ten VLTF inhriattir thin turin mipuite an chah.
Ni 26.9.2021 Pathianni
September ni 26, 2021 Pathianni tlai dar 6:00 vel khan Pu K. Laldinthara, kum 42, h/o Lalhunmawii, Phullen Ar Farm veng chu, nat lawkna awm lovin Lungphu chawl vangin an chenna in Phullenah a thi. A ruang hi lumen a ni a, ni 27.9.2021-ah vui a ni.
Ni 4.10.2021 Thawhtanni:
October ni 4, 2021 Thawhtanni chhun khan Community Hall, Diakkawnah Phullen khuaa kum 2022 a Lo nei turten Lo an thlang. Lo neih tum chhungkaw 203 ten zingkarah Lo number an pawt a, Pu H Lalramsanga, Mautui veng chuan No. 1-na a pawt a ni. Chhun lamah Lo hi thlan a ni a. Kum danga tih thin dan angina Lo leituten an thlang hmasa a, chumi hnuah Lo number pawttuten an thlang ve leh a ni. Kum 2022 atana Lo tura ram theh chu "HMUNTE RAM" a ni a. Ram thehin a huam chin chu hetiang hi a ni:
Suangphek
Hmunte kawng chung
Hmunte kawng hnuai
Kumpui
Kumsih
Hmangaihna ram zau
Phullen-ah hian Lo thlan ni hi "Mipa Ni" (Mipa Day) tia sawi fiam thin a ni a. Lo thlang hmasa ni tura Lo leituten Lo an leina pawisa hmang chuan Ruai an theh thin a. Hemi ni pawh hian Vawk talhin Lo thlangtu zawng zawng ten ruai an theh a, hlim takin hun an hmang a ni.
Ni 5.10.2021 Thawhlehni:
October ni 5, 2021 Thawhlehni chawhma dar 10:30 khan Pi K. Lalthanzauvi (Tezauvi) kum 50, w/o Pu R. Lalbiaknunga, Phullen chu Stroke vangin an chenna in Phullenah a thi. Pi Tezauvi hi hun rei tak natna khirh tak, Thluaka chawr awm vangin a na tawh a ni. A ruang hi Lumenpui a ni a, a tuk Ni 6.10.2021 chawhma dar 10:00 AM ah vui a ni.
Ni 8.10.2021 Zirtawpni:
October ni 8, 2021 Zirtawpni zing dar 7:00 khan khan Phullen BDO Office tualah Cleanliness Week kharna hun tawi hman a ni a. Phullena YMA Section leh tual chhung Office hrang hrangte Faina kawnga inelnaa a tithate hming puan a ni. YMA Section fai ber chu Taitesena Section a ni a, Office (Department) fai ber chu PHC Phullen (Health Deptt) a ni a, School fai ber chu PES, Phullen Vengthar a ni a, SHG (Waste to Art) titha te chu Bazar SHG & Phunchawng SHG te an ni.
Ni 11.10.2021 Thawhtanni:
October ni 11, 2021 Thawhtanni zing dar 5:00 khan Pi Lalrambuatsaihi (Lal-i) w/o David Laldanglova Phullen vengthar chu Civil Hospital Aizawl-ah Mitliam vangin a thi. A ruang hi Phullen-ah haw puiin tlaivarpui a ni a, a tuk ni 12.10.2021-ah vui a ni.
Ni 15.10.2021 Zirtawpni:
October ni 15, 2021 Zirtawpni zing dar 8:10 khan Pu K.Lalhmuakliana (Liana), kum 46, s/o Pu K Lalthlengliana, Phullen Diakkawn chu, Aizawl venghnuaiah a thi. Liana ruang hi Phullen-ah hawpui a ni a, zanah lumenpui a ni a. Covid-19 hri len hnuah hian, tun hmaa tihdan thin ang diak diakin thil a tih theih loh a. Liana vuina hun pawh hi a ruangin Phullen a thlen veleh hman nghal a ni a, a tuk 16.10.2021 zing dar 7:00 ah ruang thlahna leh thlalak hun hman a ni thung.
Ni 15.10.2021 Zirtawpni:
October ni 15, 2021 Zirtawpni hian MNF Phullen Unit chuan an din champha vawi 60-na Diamond Jubilee an lawm a. He hun hmanpui tur hian Pu L.Thangmawia MLA, Lengteng Bialtu chu Phullenah a lo kal.
Ni 16.10.2021 Inrinni:
October ni 16, 2021 zan hian Phullen Mistiri Association leh YMA Phullen Branch tangkawp te Phullen Community Hall-ah Kuang siamin an hnatlang. Tun tum hi Phullen-ah chuan Thingzai phek (thing phel) hmanga Kuang siam hnuhnung ber tura ngaih a ni a. Kuang siam leh hun atang chuan Thingzai phek (thing phel) hmang lovin Dura Tuff hmanga siam tawh turin ruahman a ni.
Ni 29.10.2021 Zirtawpni:
October ni 29, 2021 Zirtawpni khan Tuiriza leh Tuivai kama loneitu Tuiriza Farmers Association chuan Lo zawh runpui an hmang. He hun hmanpui tur hian Agriculture Department leh Sawrkar mi pawimawh tak tak te bakah Chanchinbumi leh LPS Kuthnathawktu huang te sawm an ni a, hlim takin hun an hmang ho.
Ni 6.11.2021 Inrinni
Phullen-ah Covid-19 kai thar an awm leh ta a, hei vang hian VLTF Phullen chuan hetiang hian thuchhuah a siam:
Vanduai thlak takin kan khawtlangah Covid positive pathum kan nei hlauh mai a, tunah hian chhui ngaite chhui felin, khung ngaite kan inkhung hrang fel ta niin hriat a ni a, kan khawtlang kal zel dan tur hetiang hian ruahmanna siam a ni.
INKHAWM CHUNGCHANG : November ni 7, 2021 Pathianni hian Chawhma leh Chawhnuah hmai tuam (face mask) vuahin, zai lova inkhawm theih a ni ang a, zan lamah chuan inkhawm rih loh tur a ni. Kan boruak a zirin inkhawm chungchangah thu thar tihchhuah leh thin a ni ang a, Kohhran thil pawimawh khawn chu chhunzawm theih a ni ang.
SCHOOL KAL/LUH CHUNGCHANG : 4C-ah dam lo enkawl lai kan neih chhung chuan School kal/hawn rih loh tur a ni.
MAXI CAB SERVICE CHUNGCHANG : Sumo Service te lehlangin, mahni duh hunah service remtih a ni a, passenger ten darkar 12 chhunga negative certificate neih vek tur a ni a, VLTF hnenah driver kaltlangin theh luh thin tur a ni. Tlan hun leh tlan zat turah bituk siam a awm lo. Kawng lakah passenger Covid-19 test certificate neilo lak phal a ni lo.
Ni 9.11.2021 Thawhlehni
November ni 9, 2021 Thawhlehni tlailam dar 4:15 khan Phullen khawtlang hruaitu hlun tak, term 7 chhung zet Phullen VC lo ni tawh Pu Lianthangpuia, Kum 77 h/o Pi Chawikungi, Phullen vengthar chu Aizawl Civil Hospital ICU-ah Stroke vangin a thi. A ruang hi Phullen-ah hawpui nghal niin, lumenpui a ni a, a tuk ni 10.11.2021 chawhma dar 11:00-ah vui a ni. Covid-19 hri avanga inkaihhruaina zawm a ni a, zan lumenna leh vuinaah hian zai a ni lo a ni.
Ni 12.11.2021 Zirtawpni
November ni 12, 2021 Zirtawpni hian Phullen leh Thanglailung chawmtu tur Tuivawl tuilak “Combined Phullen & Thanglailung Water Supply Scheme (Pumping)" chu Er. Lalmuanzova, Secretary to the Govt. of Mizoram, PHED chuan Tui pump chhinna (Trial-run) hlawhtling takin a nei. He tui lak siamna atan hian NABARD scheme RIDF-XXIII atangin cheng vaibelchhe 14 ruahman niin, JDSS ten kum 2018 atangin an siam a, tunah zawhfel a ni ta a ni. He hunah hian PHED atangin Er. C. Lalremsiama, Engineer-in-Chief leh Er. F. Liantluanga, Chief Engineer, Zone-II te bakah engineer dang thahnem tak an kal a. Tin, Saitual DC leh Phullen BDO bakah khawtlang hruaitu mi engemaw zat an tel a ni. He tuilak hian Jal Jeevan Mission(2019-2020) hnuaia thawh zawh fel tawh Phullen khuaa In 430 leh Thanglailung khuaa In 176 te chu House connection (FHTC) hmangin nitin in tinah 55 lpcd in tui pe thei ziah tura duan a ni.
Ni 17.11.2021 Nilaini
Hun engemaw chen Covid-19 avanga Phullen a zirna Sikulte khar a nih hnuah Ni 17.11.2021 Nilaini atang hian Phullena zirna In te hawn tan leh a ni.
Ni 17.11.2021 Nilaini
November ni 17, 2021 Nilaini hian YMA Vanapa Section chuan an section huam chhunga harsa zual Pu Thiawnga Buh sengpuiin an hnatlang. He Buh seng hnatlangah hian mi thahnem tak an thawk chhuak a ni.
Ni 27.11.2021 Inrinni
November ni 27, 2021 Inrinni khan VLTF Phullen chuan hetiang hian khawtlang mipui hnenah Hriattirna a chhuah:
Phullen khawchhungah Covid-19 Positive kan neih avangin hetiang hian Phullen khawchhungah inkaihhruaina siam a ni-
Contact tracing kalpui chhung Ni 26 Nov. – 3 Dec., 2021 (Ni 7 chhung) hian puipunna lam chi reng reng huaihawt rih loh tur a ni. Hnatlang, Committee, Inkhawm, Sikul kal leh infiamna lam chi reng reng khawtlangah tuman kalpui hrih loh tur a ni.
Inlam leh ram lamah hlawhfa mi 5 aia tam rawih phal a ni hrih lo a, Contact tracing neih chhung hian chhungkua inkalpawh lo tur a ni. Loh theih loh avanga khawlai chhuak ten Hmui tuam (Face mask) vuah vek tur a ni.
Khawchhungah hri a darh lohna turin khawtlang mipuite fimkhur tak leh thuawih taka awm zel turin kan inngen a. He hri hi a darh zel lohna turin khawtlang mipuite tawngtai turin kan inngen a ni.
Ni 4.12.2021 Inrinni:
December ni 4, 2021 hian VLTF Phullen chuan khawtlang inkaihhruaina thu thar hetiang hian a tichhuak:
Kohhran Inkhawm: Khawtlangah Covid-19 hrikai kan awm leh tak avang leh Test hma bak kan la awm avangin, Ni. 8.12.2021 Nilaini zan a ral hma chu inkhawm rih loh nise. Khawchhungah harsatna dang a awm a nih loh chuan Ni 8.12.2021 Nilaini zan atangin inkhawm theih beisei a ni.
Tin, Kohhran hnuaia thil khawn hrang hrang leh Chanchinbu sem pawh hmui tuam (Face mask) vuah chungin tih theih a ni.
Sikul kal chungchang: Board Exam tur Class X leh XII te Ni 6.12.2021 Thawhtanni atangin Sikul an kal remtih a ni a. Class dang te erawh chu test hmabak te result a zirin inhriattir chhunzawm a ni.
Covid -19 hriin min la chenchilh reng a, mipuite fimkhur taka kan awm zel a pawimawh hle. Khawchhunga lo zin tur leh haw tur reng reng te chuan Covid Test result nei theuh turin kan inngen bawk a ni.
Ni 25.12.2021 Inrinni
Krismas ni a ni a. Covid-19 hri leng a ziaawm deuh hret a, Aizawl (AMC area) tih lohah chuan Mizoram hmun tam takah ruai nen Krismas hi lawm a ni a. Saitual district-ah chuan DC in ruai theh lo tura thu a chhuah bakah Phullen-ah Covid-19 kai an awm mek avangin Krismas hi ruai theh a lawm a ni lo va. Krismas ni ah Thingpui ruai nen lawm a ni.
Ni 28.12.2021 Thawhlehni
Phullen & Thanglailung chawmtu Tuivawl tui lak (pump) hna chu December ni 28, 2021 atang hian Phullen WATSAN kutah a awm a. Hemi ni hian Phullen WATSAN ten Deptt mi vilna hnuaiah tui hi a vawikhat nan anmahniin an pump tan a. Tui pump hi PHE Deptt hnuaia kalpui tho nimahse thawktu an indaih loh avangin Deptt hnuaiah WATSAN ten a pump hna hi an thawk a ni.
Ni 30.12.2021 Ningani
December ni 30, 2021 zing dar 8:30 khan Covid-19 hri kai (Positive) nena inhnimhnai avanga khung hran (Quarantine) mek mi 6 te RAgT hmanga enfiah an ni a. Heng mi 6 atang hian mi 3 ten Covid-19 an kai tih hmuhchhuah a ni a, Phullen 4C, Govt Middle School-II ah enkawl nghal an ni.
Ni 30.12.2021 Ningani
December ni 30, 2021 zan dar 7:00 hian Phullen Community Hall-ah kum 2022 chhunga YMA Phullen Branch hruaitu tur thlan a ni a. Inthlan hi VC ten an kaihruai a, YMA member mi 67 ten vote an thlak a, heng mite hi an thlang chhuak:
President : Pu Lalruatsanga Pautu
Vice President : Pu Emanuel Lalchhuanawma
Secretary : Pu Lalhruaikima Tochhawng
Asst. Secretary : Pu Lalkrosschhuanga
Treasurer : Pu Lalhmingliana
Fin. Secretary : Pu Zoramhluna
Ni 31.12.2021 Zirtawpni
December ni 31, 2021 Zirtawpni hian Phullen & Thanglailung Water Suply Scheme, Tuivawl tui lakna Tuizempui (Main reservoir) Phullen atangin Thanglailung pek tan a ni.
Ni 31.12.2021 Zirtawpni
December ni 31, 2021 Zirtawpni kum 2021 ni hnuhnung ber a ni a. Hemi zan hian tualchhung Kohhran hrang hrang ten kumhlui thlahna pual inkhawm an huaihawt a. Kum 2021 chhunga an Kohhran member chatuanram pantate sunna hun an hmang bawk.
************Buata Bawihtlung*************
KUM 2021 CHHUNGA PHULLEN MI CHATUAN RAM PAN TATE
Slno Hming Chhungte Thih Ni
1. Tv. Vanlalchhuanawma s/o Pu R. Lalbiaknunga 17.2.2021
2. Pu Bawihchhawna f/o Pu Tlangliankhuma 4.3.2021
3. Pi Darhnuni f/o Pu Rinsailova (L) 9.4.2021
4. Pu R. Laldawla h/o Pi Laiveti 14.5.2021
5. Upa J. Ngurchhawna h/o Pi Lalrinkimi 21.6.2021
6. Pi Aithangpuii w/o Pu B.Ngurchhawna (L) 9.7.2021
7. K. Laldinthara h/o Pi K.Lalhunmawii 26.9.2021
8. K. Lalthanzauvi w/o Pu R. Lalbiaknunga 5.10.2021
9. Pi Lalrambuatsaihi w/o Pu David Laldanglova 11.10.2021
10. Pu K. Lalhmuakliana s/o Pu K. Lalthlengliana 15.10.2021
11. Pu Lianthangpuia h/o Pi Chawikungi 9.11.2021
# Buata Bawihtlung
KUM 2021 CHHUNGA PHULLEN KHAWTLANG HRUAITUTE
PHULLEN VILLAGE COUNCIL
President : Pu Vanzairemmawia
Vice President : Pu Lalzikpuia
Treasurer : Pu Zoramhmangaiha
Secretary : Pu PC Malsawmhlua
Members : Pi Lalchhandami
Pu B. Lalhriatpuia
Tlangau : Pu Zoramthanga
YMA PHULLEN BRANCH
President : Pu Lalruatsanga Pautu
Vice President : Pu Lalchhuanawma
Secretary : Pu Lalhruaikima Tochhong
Asst. Secretary : Pu Lalkrosschhuanga
Treasurer : Pu Lalhmingliana
Finance Secretary : Pu Zoramhluna
MHIP PHULLEN BRANCH
President : Pi H. Lalsawmliani
Vice President : Pi Lalneihsangi
Secretary : Nl. Lalhmachhuani Pautu
Asst. Secretary : Pi B.Lalnunhlimi
Treasurer : Pi Zoramengi
Finance Secretary : Pi B. Lalthlengkimi
MUP PHULLEN UNIT
President : Pu Zoramnuara
Vice President : Pu K. Zamawia
Secretary : Pu H. Lalnghinglova
Asst. Secretary : Pu Lalhnehzauva
Treasurer : Pu Lalneihzuala
Finance Secretary : Pu A. Zoramthanga
VDP PHULLEN
Chairman : Pu PB. Lungmuana
Vice Chairman : Pu Lalpana
Secretary : Pu V. Lalrinchianga
Asst. Secretary : Pu BT. Lalhruaitluanga
Treasurer : Pu K. Laldinthara
Finance Secretary : Pu F. Vanlalnghaka
PSUA
President : Tv. Lalnunsanga
Vice President : Tv. C. Lalrinsanga
Secretary : Tv. Vanlalchhuma
Asst. Secretary : Tv. Lalnundika
Treasurer : Nl. F. Lalrinsiami
Finance Secretary : Nl. Lalhnehpuii
WATSAN, PHULLEN
Chairman : Pu Vanzairemmawia
Secretary : Tv. Lalrozuala
Treasurer : Pi VL.Rammuani
Finance Secretary : Pu F.Lalsangzuala
PHULLEN HIGHER SECONDARY SCHOOL, MANAGING BOARD
Chairman : Pu Vanzairemmawia
Vice Chairman : Pu R. Lalthantluanga
Secretary : Pu F.Lalsangzuala
Asst. Secretary : Pu PC. Malsawmhlua
Treasurer : Pu KC. Zahmingthanga
Finance Secretary : Pu J. Pachhunga
PHULLEN DIVERS UNION
President : Pu Lalhmingliana
Vice President : Pu PB. Lalthazela
Secretary : Pu PC.Lallawmzuala
Asst. Secretary : Pu B.Vanlallawma
Treasurer : Pu Lalnunthara
Finance Secretary : Pu H.Lalhruaikima
VILLAGE LEVEL TASK FORCE (VLTF) PHULLEN
(w.e.f 10.1.2021 Pathianni)
Chairman : Pu Vanzairemmawia
Vice Chairman : Pu Lalruatsanga Pautu
Secretary : Pu PC. Malsawmhlua
Asst. Secretary : Pu Lalhruaikima Tochhong
Treasurer : Pu Lalhmingliana
Finance Secretary : Pu Biakchungnunga
********************
A tha hle mai, hetiang a record mumal tak buatsaihtu hi i fakawm takzet.
ReplyDeleteA va tha ve
ReplyDelete