PHULLEN AH HALIPAD (HELIPORT) KAN NEIH DAN

Vawiin 25.8.2018 Inrinni hian kan khua Phullena HELIPAD chu hawn a ni dawn ta a. Chumi denchhen chuan, Phullen in Helipad kan neih dan chanchin hi ka rawn titi pui ve ang e - Buata.

Kum 1966 March ni 1 khan, Mizo National Front (MNF) chuan India laka zalenna thu (declaration of independence) a puang ta rup mai a. Kum 1966 ah chuan India sipaite Mizoramah an lo lut nghal ṭuk ṭuk a.

Hnam hmangaihna rilru kha a nasa a, kan khua Phullen aṭang pawhin MNF sipai (MNA) a lut an tam a. Mawmrang kham karte bihruknan a rem bawk si a, India sipai hote pawhin an rawn hre hle a. Phullen ah chuan Sipai ho chu an rawn kal kual ṭhin a. An che rova thei hle a, kan VC Pu Thanzaua (L) te pawh khan a mimal tak pawhin kut an tuar hle a, tin Major Pangliana te phei chuan Phullen ah ngei hian Ram tan nunna an chan ta hial kha a ni a.

Phullen a India sipai rawn kal hmasate hi Major Paul-a hote an ni a, a hnuah 9th Bihar Regiment te an ni leh a (Source: Pu Lianthangpuia)  Kum 1968 ah Vai (India sipai) ho chuan Lal huan tlangah Camp siamin an rawn inbengbel a. Chutianga an awm ngheh takah chuan, an hotu liante leh sipaiho eitur leh bungrua bakah thil dang dang, Kel te thlengin Helicopter hmangin an rawn pe ṭhin a.

Khatih laia Helicopter ṭumna hmun leh eitur a rawn thlakna ṭhin Helipad chu, Khandaih hmar lam, Lungpui chawlhhmun bul tlang, Darkhuma vengtlang an tih ṭhin, tuna PHC hmun ni ta hi a ni a. Lungpui chawlhhmun bul, khan daih lam pang per hi tun hma chuan Khawlhring veng te pawh an ti a, Zawlbuk te pawh a awm ṭhin a ni awm e.

Darkhuma vengtlang chu, Vai ho ei tur (supply) rawn thlakna leh helicopter ṭumna a nih avangin SUPPLY THLAK TLANG emaw HELIPAD emaw tih a ni zui ta reng a. Hetianga Supply an thlak ṭhin lai hian, Vai awmna kha Lal huan tlang daih kha a ni a, a hla ve deuh hret a. Khandaih leh Chawlhhmun naupangte khan, Bungrua, eitur an rawn thlakna kha kan thlen khalh fo. An thil thlak keh darhte kha kan lo chhar ve ṭhin. Parachute a'n uai thla dalh dalhte kha a hmuhnawm ṭhin a, a parh loh khan kan lawm ve hle ṭhin; an thil thlak a keh darh ṭhin vangin. Giu leh tel an thlak ṭumin kan mawm haw thei ve hle.

India Sorkar leh MNF ten kum 1986 June Ni 30 a  Remna an ziah takah khan, Vai (Sipai) ho pawhin haw zai an rel ta a. Kum 1986 ah haw rum rum thei bik hek lo, kum 1987 kum tir lamah Phullen min chhuahsan ta a. Chutia Vai ho an haw ta chu, an awmna hlui VAI CAMP tlanga an In hlui, Di In engemaw zat kha keini naupang harh te khan kan chen darh ta a, kan bawh thlu chhe zo ta a nih kha.

Vai an awm tak lohah chuan Vaiho supply thlakna leh an lalte rawn ṭumna ber, Darkhuma veng tlanga HELIPAD pawh chu Naupang infiamna atan bak hman a ni ta meuh lo a. Sikul naupang ten Game Ni ah kan hmang ṭhin. Mahse, Supply thlak tlang tih a ni zui ta reng tho a.

Khua a lo ṭhang zel a, Sorkar in Helpad ah tak chuan Damdawiin (PHC) a rawn sa ta a. Chu Damdawiin (PHC) chu September ni 5, 2008 Zirtawpni khan khatih laia Health Minister Pu Tlanghmingthanga khan a hawng ta a. Chuta ṭang chuan, Helipad chu Damdawiin / PHC tlang tia sawi a ni zui ta a ni.

Tun hnaiah, emergency thilah leh ṭangkai atan Helipad neih chu a ṭha tiin Bialtu MLA Dr Ngurdibgliana chuan Helipad neih dan min ngaihtuah sak a. General Administration (Aviation) lam ten bawhzuiin Phullen aṭanga hmar thlang lam, THENTLANG ram, theichek bulah HELIPAD chu siam a ni ta a. He Helipad hi, a dung meter 50 leh a vang meter 30 a zauin laih a ni a, a lai takah feet 45 bial a zau chu PCC-in chhun a ni ta bawk.

He Phullen Helipad hi vawiin August ni 25, 2018 Inrinni hian Hawn a ni dawn ta nghe nghe a. Hetianga Helipad kan nei dawn ta hi a lawmawm tak zet. Tun hma a kan lo neih tawhte kha chu, Rambuai vanga Sipai ho mamawhna vanga neih chauh a ni a. Tun ami erawh chu Hmasawnna vanga MLA zara kan neih a ni a, a lawmawm tak zet.

He Helipad hi khawtlang mipui ten ṭangkai taka kan hman zel ka beisei.

#Buata 25.8.2018
#BB250820181211PM