PHULLEN DOCUMENTARY FILM RELEASE A NI

Nimin January ni 3, 2019 Thursday zan khan Phullen Diakkawn ah Phullen Historical Society te siam “Phullen Documentary Film” chu Phullen VCP Pu B. Lalhriatpuia, Chief Guest chuan ropui takin a tlangzarh a. He hunah hian Pu Lalbiakdanga Adviser, Phullen Historical Society (PHS) chu Guest of Honour a ni.

He hunah hian PHS hruaitute bakah Aizawl lam atangin Guest of Honour Pu Lalbiakdanga Adviser PHS te, Welfare Chairman Pu Lalrammawia te, Vice Chairman Pu R. Kapkhuma te, PHS Sr Adviser Prof JV Hluna te leh Welfare hruaitu engemaw zat an tel a. Tin, tualchhung khawtlang hruaitu pawimawh tak tak Phullen Village Council member te, YMA Phullen Branch hruaitute, MUP leh MHIP hruaitute bakah Documentary Film siamna a mi pawimawh tak takte an kalkhawm a ni.

Film Release tu Chief Guest Pu B. Lalhriatpuia chuan, Phullen tana thil hlu tak Phullen Documentary Film siam a ni chu lawmawm a tih thu sawiin a siamtute chu a fak a. Khawtlang mipui kalkhawmte chu kan tu leh fate tana thanlenna tlak khawtlang nuam leh tha siam tura theih tawp chhuah turin a chah a. Kan khawtlang hian khawtlang dan zawm tum miah lo leh zawm duh miah lote hi a mamawh lo a, mipuite chu khawtlang dan ngaipawimawh tur leh zawm turin a ngen a ni.

He Film Release na hmun atan hian Community Hall ruahman zet a ni a, mipui kan len vek dawn loh avangin Phullen Diakkawn ah Release a ni ta a. He Release inkhawm hi Phullen Documentary - Khandaih Harhna Sub Committee Chairman Upa Lalrinzauvan a kaihruai a, Secretary PHS Pu Lalbuatsaihan Film siam dan reports a pe a, PHS Adviser Pu J. Pachhunga chuan Film thlirlawkna a neih bak PHS Adviser Prof JV Hluna chuan thu ṭha tak a sawi a. PHS Chairman Pu Vanthuampuia chuan Phullen Historical Society thil tum leh hmalaknate sawiin, Documentary film siam na kawnga mi ṭangkai tak takte hnenah lawmthu a sawi bakah, tualchhung zaithiam tak tak te an zai bawk.

Zan thlasik khawvawt karah khawtlang mipui thahnem tak an fuankhawm a, Big screen (Projector) hmangin Film hi enho nghal a ni a. Hun tawp lamah Documentary Film changtu mi thenkhatte hnenah PHS Special Award hlan a ni a, Award dawngtute chu – Pu Lalrinenga, Upa Lalrinzauva, Pi Lalchhandami, Pi Zomuanthangi, Pu R. Lalnghinglova leh Pu PC Lawmkima te an ni.

He Phullen Documentary Film hi DDK Aizawl a chhuah tura Phullen Historical Society te siam a ni a. DDK Aizawl a chhuah tur hian Programme pathum ah then sawm niin, then hnih chu DDK ah hian chhuah a ni tawh a, then thumna hi January thla chhung hian chhuak leh tura ruahman a ni. He film hi PHS te hnen atangin Rs 200/-   aia tlem loin lei theih a ni.