THANGLAILUNG KHAW CHANCHIN TLANGPUI

Thanglailung hi Mizoram hmar lam, Aizawl atanga 120 km vela hla, Phullen bul a awm a ni a. Khaw upa lo tak niin Vanphunga khua Khandaih, a hnu zel a Phullen khua ni ta atanga VC hrang neia indang a ni a, tunah hian In 124 an ni mek a ni.

Thanglailung

Thanglailung khaw lo pian dan:

Kum 1986 khan, khatih laia Mizoram Sorkar hriatpuinain Thanglailungah hian Vawk Farm siam turin Phullen atangin mi an awm tan a, Farm Committee pawh siam nghal a ni a. Phullen atang chuan Thanglailunga insawn hi an pung ta zel a, mumal zawka an awm theih nan kum 1989 khan Village Sub-Committee din a ni ta hial a. Helai hmun hi Phullen kawng atanga Changzawl panna kawng peng zal nuam lai tak a nih avangin Changzawl peng ti ten an sawi mai thin a.

Kum 1989-a Village Sub-Committee din a nih khan Phullen South tih a ni a. Village Sub-Committee chu kum 1990-ah Village puitlingah hlan kai niin, Phullen South (tuna Thanglailung) khua chu a lo piang ta. Tichuan, Phullen VC hnuaia awm tawh loin, kum 1990 khan a vawi khatna atan Phullen South Village Council inthlan chu neih a ni ta a. Hun a lo kal zel a, kum 1998 khan khaw hming Phullen South tih chu Thanglailung tia thlak a ni leh ta a ni.

Khaw hming put chhan:

Thanglailung khaw dai, chhim chhak lam deuhah hian Thanglaia Lung kawh a awm a, he Lung hi, pa chak em em mai Thanglaian Chhirdem Lui atanga a kawh chhuah nia sawi a ni. A awmna hi tlang chung zawl nuam tak a ni a, Chhirdem Lui hi mual mawng thuk taka luang a ni. He hmunah hian pa chak Thanglaian inbuana chotu lo hmuh ngei turin he Lung hi a kawt chhuak niin a chanchin sawi thin a ni. A Lung hi en mai pawhin Lui a lung awm thin ni ngeiin a ngaih theih a, a bul velah hian Lung dang hmuh tur a awm lo a. Hei hi Pi leh pute atangin Thanglaia Lungkawh tih a ni a, hemi hming chawi hian Phullen South khua ni thin kha kum 1998 khan Thanglailung tih a lo ni ta a ni.

Sakhuana lam lo indin dan:

Kum 1986 a Phullen atanga Thanglailunga Vawk vulh tura awmte chu Kristian (Presbyterian) vek an ni a. Thanglailunga an awm tirh hian Phullen atangin la indang lo mahse a hlat avangin inkhawm phak a ni lo a. Tichuan Presbyterian Kohhran chuan kum 1987 khan Preaching Station a nei tan a. Hun a lo kal zel a, kum 1991-ah Preaching Station chu Kohhran puitlingah hlan kai niiin Thanglailung Kohhran chu a lo piang ta a. Kum a lo vei zel a, kohhran dangte pawh lo piangin Salvation Army chu June ni 7, 1997 khan mumal takin a lo ding tan ve ta bawk a. Tichuan Thanglailungah hian Kristian sakhaw betu Kohhran hrang hrangte pawh changtlung takin an ding zui ta zel a ni.

Thalai intel khawm pawl YMA din a ni:

Thanglailungah hian Mizorama pawl lian leh tangkai tak, Mizo thalai rual intel khawm pawl Young Mizo Association (YMA) chu din ve a ni a. A tir chuan Phullen Branch YMA hnuaha a awm a, Thanglailungah awm an tam tak hnu 1988 khan Taitesena Section tiin YMA Phullen Branch hnuaia Section pakhat angin a awm a. Kum 1990 a Thanglailungin VC puitling a neih a, khaw hrang a nih takah khan YMA pawh Phullen Branch atanga indangin Branch puitling Thanglailung a lo ni ta a ni.

Tunah hian Thanglailung hi In 124 vel niin, VC awpna hnuaiah khaw inlungrual tak leh nuam tak a ni a, khawtlang nun a nuamin mipui an hlim a, zai leh lamte an thiam hlawm hle a, khaw lian ni lo mahse, khaw nuam tak a ni.

#Ziaktu : Buata Bawihtlung, Dt 2.07.2019