PHULLEN DIARY 2020

 

KUM 2020 PHULLEN DIARY

- Buata Bawihtlung

JANUARY 2020

Ni 1.1.2020 Nilaini:

Kum thar ni a ni a, zing Dar 4:15-ah Pi Lalbiakthari, kum-62 Hermon veng chuan, SLE natna vangin a thi a. A ruang hi he mi ni vek hian vui liam nghal a ni. He mi ni a Kohhran hrang hrang ten Kumthar lawmna inkhawm Programme a duan tawhsa chu thulh vek a ni.

 

Ni 2.102020 Ningani:

Hemi ni hian Kohhran hrang hrangin kum 2020 kumthar lawmna hun an hmang a, Biak Inah inkhawmin, ruai nen an lawm a ni.

 

Ni 5.1.2020 Pathianni:

Phullen Pastor Bial vawngtu, Pastor Lalngaihawmna chu Ramrthar Field, Tuingoi Bial (Tripura) ah sawn a nih avangin, Ni 5.1.2020, Pathianni Chawhnu inkhawmah Phullen Kohhran Biak Inah Bial hmingin thlahna hun hman a ni.

 

Ni 5.1.2020 Pathianni:

Hemi ni hian PCI Phullen Vengthar chuan Kum 2020 chhunga  Rawngbawltu  hlanna hun, Biakin-ah an hmang.

 

Ni 7.1.2020 Thawhlehni:

Mizorama Zirna In hrang hrang te kum thar atana School luh \an leh hun a ni a. Hemi ni hian kan khaw chhunga Zirtirtu leh School Naupang zawng zawng te pawh uniform ha in school an lut leh tan.

 

Ni 7.1.2020 Thawhlehni:

Hemi zan hian, Community Hall-ah kum 2020 chhunga Phullen Branch YMA hruaitu tur (Office Bearer) thlan a ni a. YMA member thahnem tak an kalkhawm a, heng mite hi an thlang chhuak:

 

          President                 :         Pu J.Pachhunga

          Vice President          :         Tv. Imanuel Lalchhunawma

          Secretary                :         Pu Lalruatsanga Pautu      

          Asst. Secretary        :         Pu Lalrinawma (Pu Lalhruaikima Tochhawng)

          Treasurer                :         Pu Lalhmingliana

          Fin. Secretary          :         Pu Zoramhluna

 

 

Ni 12.1.2020, Pathianni:

Hemi ni chawhma inkhawmah hian, PCI Phullen Pastor Bial vawngtu tur Pastor Lalbiaknunga Dahnghehna hun (Induction service) Phullen Kohhran Biak Inah neih a ni. Induction neih tirtu hi Rev.Vanlalrova Khiangte, Secretary Mizoram Synod a ni.

 

Ni 12.1.2020 (Pathianni)

Hemi ni chawhma inkhawmah hian, PCI Phullen Vengthar Bial Pro-Pastor thar tur, Tv. Lalnunpuia dahnghehna hun (Induction Service) Phullen vengthar Kohhranah neih a ni. Induction neih tirtu hi Pastor MS.Dawngliana Phullen Vengthar Pastor Bial vawngtu a ni.

 

Ni 21.1.2020 Thawhlehni:

Hemi ni hian Phullen tlangval Lalliansanga s/o Pu PL Vanlalhruaia, Phullen Diakkawn chuan New Delhi-ah Indian Council for Child Welfare (ICCW) National Bravery Award 2019 a dawng. He award hi, kum 2018 March ni 29-a an thianpa F. Lalruatfela te electric current-in a man an chhanna kawnga huaisen taka midang tana a inpekna vanga dawng a ni.

 

Ni 22.1.2020 Nilaini:

Hemi ni hian Phullen leh Saitual inkara Tuivawl lei, NABARD scheme “Rural Roads & Bridge” atanga ^ 928.00 lakhs hmanga dawh chu Hon’ble Minister, P&E Pu R. Lalzirliana chuan a hawng. Tuivawl Lei hi M/S Sunshine Overseas Infra Pvt.Ltd. te dawh niin, ni 6.12.2019 khan dawh zawh a ni a. Lei seizawng hi meters 55 niin, a zau zawng hi meter 9.5 a ni a. Lei thar hian quintals 700 dawl zo tura ngaih a ni a, Lei hlui khan quintal 100 dawl zo anga ngaih a ni.

 

Ni 24.1.2020 Zirtawpni:

PCI Phullen leh PhullenVengthar Pastor Bial te chuan, ni 24.1.2020  atanga tan in, Pathianni thleng awh turin, Bial K|P Conference an hmang a. Phullen Pastor Bial lam ten Phullen Kohhranah an hmang a, Phullen Vengthar Bial lamin Phullen Vengthar Kohhranah an hmang thung.

 

Ni 31.1.2020 Zirtawpni:

Hemi zan hian Village Council Phullen ruahmannain tualchhunga pawl hrang hrang hruaitute ko khawmin, “All NGO Meeting” pawimawh tak neih a ni a. Phullen leh Changzawl ramri chungchang an sawiho.

 

Ni 30.1.2020 Ningani:

Ni 30.1.2020 (Thu) zan dar 7:00 hian, kum 2020 chhunga YMA Section hrang hrang te Office Bearers thlan thar a ni.

 

 

 

 

FEBRUARY 2020

 

Ni 2.2.2020 Pathianni:

Hemi ni, tlai lamah Phullen Community Hall-ah, HSLC leh HSSLC exam turte pualin Phullen School Staff Union (PSSU) chuan fuihna hun a huaihawt a. He hunah hian tualchhunga zilai HSLC leh HSSLC exam hmachhawn tur mi engemaw zat an kal.

 

Ni 5.2.2020 Nilaini:

February ni 5, 2020 Nilaini hian Tuivawl leh Phullen inkar kawngpui siam that mek chu a hmunah YMA Phullen Branch hruaituten an enpui a, hnathawktute nen kawng tha tak siam a ni theih dan turte an sawi ho.

 

Ni 5.2.2020 Nilaini:

Hemi ni hian Pu Laldawla tunu Christina Zothankimi, kum 2, d/o Pu Lalrinhlua, Phullen Farkawn veng chu vanduai thlak takin an Tuizemah a chesual a, tlai lam dar 3:30 pm khan a thi.  A ruang hi lumen niin, a tuk ni 6.2.2020 khan vui liam a ni.

 

Ni 6.2.2020 Ningani:

Hero Junior National Football Championship for Dr. B.C. Roy Trophy 2020 Shillong-a khelh zawh takah Phullen tlangval Malsawmtluanga (s/o Pu Lalsangliana Phullen Diakkawn) telna Mizoram Teamm chuan Punjab team hnehin an champion a, Sawmtea hian hun pangngaia Mizoram team goal awm chhun a khung a, penalty-ah a khung leh bawk.

 

Ni 18.2.2020 Thawhlehni:

YMA Kumpuan “Zirna uar” tih chu, ni 18.2.2020 (Tue) zan khan a hawnna neih a ni a. He mi bawhzui nan hian Branch YMA Committee te chuan Zirlai awmna In te an fang kual.

 

 

 

MARCH 2020

 

Ni 6.3.2020 Zirtawpni:

Hemi ni hian Phullen Public Playground-ah ropui takin Chapchar Kut 2020 lawm a ni.      Chapchar Kut hmanna senso hi VC leh RD Department leh tual chhung pawl hrang hrang ten an thawh khawm a. Phullen BDO Pu Lalrinawma Khiangte chu Kut Pa a ni a, khawtlang hruaitu VC te, YMA hruaitu te, pawl hrang hrang hruaitute leh khawtlang mipui thahnem tak an tel a. 

          YMA Section pathum te chuan a hohovin Cheraw an kan bakah, Kalchhet kal, Insuknawr leh Solakia hmangin an intihsiak a, Vanapa Section chu pakhatna an ni a. MHIP ten Khuallam hmuhnawm tak an entir a, tleirawl kum 14 hnuai lam  ten Chheih lam hmuhnawm tak an entir bawk. Kum 2020 Chapchar Kut Miss atan Nl. K. Lalrinmawii d/o K. Lalsangzuala (L) thlan a ni.       

          Tin, Tlangval chhuanawm pathum huaisen lawmman dawngtu, Lalliansanga leh Vanlalduhawma te bakah Inkhel thiam Mizoram aiawha khel Malsawmtluanga te chawimawia hlan an ni bawk.

 

Ni 7.3.2020 Inrinni:

Pi Malsawmi kum 71, Pi V. Lalramhluni nu Phullen chu hemi ni tlai dar 4:45 pm khan Awmna leh Khawsik vangin Phullen-ah a thi. A ruang hi Lumen niin, a tuk March ni 8, 2020 Pathianni-ah Khandaih thlanmual-ah vui liam a ni.                  

                               

Ni 8.3.2020 Pathianni:

Salvation Army, Phullen Bialtu CO Capt.Lalrinmawia chu hmun dangah sawn niin, ni 10.3.2020 hian Phullen a chhuahsan dawn a, Pathianni chawhmaah hian Phullen Corps ten thlahna hun an hmang a, zan lamah Farewell Meeting neih leh a ni

 

Ni 14.3.2020 Inrinni:      

Diakkawn atanga BDO Complex panna kawng chu Ni 100 inhlawhna atanga mipui thawhkhawm sum hmangin cheithat hna thawh a ni a. Thentlangah ranvulhna hmun tur - Grazing Ground hung mek a ni bawk.

 

Ni 14.3.2020 Inrinni:

Hemi ni hian Phullen & Thanglailung Welfare Aizawl te chuan Tuma Resort, Bungbanglaah General Assembly an hmang. Tualchhung (Phullen) atangin VCP Pu B.Lalhriatpuia, VC Treasurer Pu H.Lalsawmliani leh Phullen Branch YMA Asst Secretary Pu Lalhruaikima Tochhawng leh Fin. Secretary Pu Zoramhluna ten an hmanpui. He hunah hian PTWA hruaitu thar thlan nghal a ni.

 

Ni 16.3.2020 Thawhtanni:

Hemi ni hian Phullen Village Council ruahmannain MUP Phullen te chu Tuivawl luiah hruai an ni a. Intihhlimna hun hmang pahin Phullen leh Thanglailung chawmtu tur Tuilakna siam mek chu a hmunah an tlawh a. Member 51 an kal a, fatu mi 3 leh VC atanga kal mi 6 te nen hlim takin hun an hmang.

 

Ni 16.3.2020 Thawhtanni:

March ni 16, 2020 Thawhtanni zan Dar 7:00 khian Mizoram Civil Pensioner Association Phullen Branch chuan Pu K.Lalthlengliana In, Diakkawnah Assembly leh hruaitu thlanna hun an hmang.

 

Ni 20.3.2020 Zirtawpni:

Covid-19 hrileng avangin March ni 20, 2020 Zirtawpni atangin Phullen Local Task Force on Covid-19 chuan khaw kawtchhuah hmun hnih – YMA Ram leh Tuidam kawnah te duty a dah tan.

 

Ni 21.3.2020 Inrinni:

March ni 21, 2020 khan Pu Tawnvela, kum 78, h/o Laithangi, Phullen Ar Farm veng chu Heart attack avangin Durtlang Hospital-ah a thi. A ruang hi Phullen-ah hawpui niin, a tuk ni 22.3.2020 Pathianni tukah Phullen-ah vui liam a ni. Covid-19 hrileng avanga inkaihhruaina zawmin, vui hun hi tih hma a ni.

 

Ni 22.3.2020 Pathianni:

Hemi ni hian India Prime Minister chuan India ram pumah, covid-19 hri leng laka kan him theih nan tumah pawn chhuah loh, “JANATA CURFEW” a puang a. Phullen-ah pawh zawm a ni a, Kohhran leh khawtlangah programme engmah siam a ni lo va, Biak Ina inkhawm pawh a awm lo. Hetih laiin Mitthi vui erawh loh theih loh a nih avangin kalpui a ni.

 

Ni 22.3.2020 Pathianni:

Hemi zan hian Phullen khawtlang hruaitu VC leh pawl pawimawh tak tak YMA, MHIP, MUP leh Kohhran hrang hrang aiawh kalkhawmte chuan Joint Meeting an nei a. Khawvel huap hrileng Covid-19 chungchanga Phullen khawtlang inenkawl dan tur an sawiho a. Sawrkar ruahmanna angina Village Level Local Task Force on Covid-19 an din a, VLTF Phullen hruaitute chu hengte hi an ni:

 

Chairman                : Pu B.Lalhriatpuia, (President Village Council)

Vice Chairman         : Pu J.Pachhunga, (President YMA)

Secretary                : Pu PC.Lalhmachghuana, (Secretary VC)

 

MEMBERS

1. Pu H.Lalhruaikima, Vice President VC

2. Pu C.Lalziakkima, Member VC

3. Pu Lalruatsanga Pautu, Secretary YMA

4. Pu Lalhmingliana, Treasurer YMA

5. Pu Zoramnuara, President MUP

6. Pi Zoramengi, Vice President MHIP

7. Upa F.Lalsangzuala, Secretary PCI Phullen

8. Upa F.Lalthlenkima, Secretary PCI Phullen

9. Pu Lalzikpuia, CSM SA Phullen

10. Upa PC.Ramnghahmawia, BCM

11. T.Upa H.Lalrinsanga, UPC Phullen

 

 

VLTF Phullen hian khawtlang tan thuchhuah an siam a, chu chu hei hi a ni:

1.     Ni 22.3.2020 atanga 30.3.2020 chhungin thil tul takah lo chuan, naupangte khawlaiah chhuah tir loh tur a ni.

 

2.     State dang atanga Phullen a lo haw reng reng, ni 14 chhung chhuakvak lo turin kan inhriattir a. Mahni inchhungah pawh fimkhur thei ang bera inkhung hran tur a ni.

 

3.     Khualzin veivak, Phullen paltlang turte khawchhungah din phal a ni lo.

 

4.     Chhungtin ten sumdawng leh hmundang atanga lokal mikhual neih rih loh tur.

 

5.     Tualchhunga awm mekte March ni 23, 2020 atanga March ni 31, 2020 thlengin khaw hranah chhuah phal a ni lova, hei hian rikrum thil leh harsatna bik a huam lovang. Harsatna lian tak vanga khaw chhuah san ngei ngei ngaite chuan VCP - Pu B. Lalhriatpuia (8414039334) emaw Branch YMA President - Pu J. Pachhunga (8837444588) emaw hnenah inhriattir hmasak tur a ni.

 

6.     March 2020 chhungin Phullen khawchhungah mikhual luh phal a ni lo.

 

7.     Covid 19 vang hian dawrkai ten thil man tih san loh tur.

 

8.     Khawtlangah ei bar kawnga harsatna a awm a nih chuan lak luh dan ngaihtuah a ni ang.

 

9.     Heng thuchhuate hi bawhchhia an awm chuan khawtlang hruaitute hnenah hriattir tur a ni.

 

10. Covid 19 kan buaipui chhung bikah chhiat tawk (Mitthi) kan awm palh a nih chuan, arang thei anga invui thin tur a ni ang a, Khawhar In len dan tur chu Branch YMA-in a ngaihtuah ang.

 

 

Ni 23.3.2020 Thawhtanni:

Covid-19 avanga ram leh khawtlangin inkaihhruaina a siam te vawn him a nih theih nan, VLTF Phullen chuan, ni 23.3.2020 atang hian Phullen kawtchhuah hmun hnih – YMA ram leh Tuidam Kawn-ah te chhun zan zawmin duty a dah tan. Kawtchhuah a Duty hi March ni 23 - 31 chhung atan ruahmanna siam phawt a ni. VC, YMA leh Medical lam mite an thawkho tha hle.

 

Ni 24.3.2020 Thawhlehni:

India Prime Minister chuan, covid-19 hri leng do nan India ram pumah, tumah pawn chhuak lova inkharkhip tlatna, “Total Lockdown (complete lockdown)”  chu March ni 24, 2020 zanlai atang hian ni 21 chhung atan a puang a. Hei hi Mizoram pawhin zawmin, Phullen-ah pawh tha taka zawm a ni.

 

 

Ni 25.3.2020 Nilaini:

VLTF leh YMA tangdun chuan, Covid-19 laka khawtlang kan him theih nan kawtchhuah hmun hnih – Tuidam kawn leh YMA rama duty-naah Gate siamin, March ni 25 zan atangin riahchilh tan a ni. 

 

Ni 30.3.2020 Thawhtanni:

Khawvel puma Covid-19 hrileng avangin India ramah inkharkhipna kalpui a nih avangin Phullen-ah pawh inkharkhip a ni a. Tui lamah harsatna tawk chhungkaw thahnem tak an awm a. Village Level Task Force on Covid-19 Phullen te remtihnain Phullen Drivers Union (PDU) chuan kan khawtlanga tui lama harsatna nei, a mamawh apiangte tan a thlawnin tui an sem a. PDU te hi motor 26 (LPK Truk, Tank Lorry, Pick-up Truck) nen Tuizem phurin an thawk chhuak a. Tui hi litres 60000 vel an chawi a, chhungkaw 121 hnenah a thlawnin an sem a ni.

 

 

 

APRIL 2020

 

Ni 5.4.2020 Pathianni:

Hemi ni hi Kristiante ni pawimawh Tumkau Ni a ni a. Covid-19 avanga fimkhurna kalpui a ngaih avangin kum dang angina a huhova khawlaia kawng zawh a remchang lo va. YMA Information Centre atangin Tumkau Ni-a au thin dan kaihhruaina hmangin au a ni a. Mipui ten mahni tualzawl theuhah Tumkau nen auvin an lo zawm a ni.

 

Ni 9.4.2020 Ningani:

Covid-19 avanga Total lockdown kalpui a nih avangin Aizawl-a zirlai leh inhlawhfa a awm te tan, hna thawh theih a nih loh avangin a buaithlak hle a. Motor service a awm lo va, zin mek tangkhang pawh an awm nual a. Chutiang mi 58 tan chuan Aizawl DC phalnain Village Level Task Force Phullen chuan a huhova Phullen a haw theihna a ruahman a. VLTF Phullen chuan motor 3 (Bus 1, Sumo 2) a ruahman bakah, mahni a motor intum engemaw zat an awm bawk a. April ni 9, 2020 chhun dar 11:00 a.m-ah Millennium Centre atangin a hohovin Phullen panin an chhuak.

 

Ni 10.4.2020 Zirtawpni:

April ni 10, 2020 khan Pi Lalbuangi, kum 82 w/o Pu Saihnuna (L), Phullen Ar Farm veng chu Cancer avangin Phullen-ah a thi.

 

Ni 23.4.2020 Ningani

April ni 23, 2020 khan Central YMA hruaitu CEC Member mi 12 lai Phullen-ah lo kalin Phullen LTF ten an lo dawngsawng a. CYMA te hian Covid-19 hrileng avanga fimkhur ngaih zualna hmuna, ramri a awm Daido khua an tlawh hnuah Phullen-ah an riaka, a hnuah Khawlek an tlawh leh nghal. Phullen Branch YMA hnenah tanpui na Rs 1000 leh Silpoulin an pe.

 

Ni 29.4.2020 Nilaini:

Hemi ni hian, Khatla Branch YMA te chuan, covid-19 hre leng laka Mizoram kan himna tura ramri a duty thin khuate an tlawh a. Phullen Block huam chhunga khaw 11 zet tlawhin Phullen pawh an tlawh a. Heng an tlawh khua te a VLTF te hnenah Pawisa leh ei tur  - Purun, Dailuah, Tel etc te an pe a ni.

 

 

 

MAY 2020

 

Ni 6.5.2020 Nilaini:

May ni 6, 2020 khan Phullen Local Task Force leh YMA Phullen Branch-te chuan Phullen RD Block leh Tuivai Group YMA huam chhunga, Covid 19 vanga ramri a duty - Daido, N. Khawlek leh Vanbawng khua te an tlawh a. VLTF leh Branch YMA te hian, Phullen khawtlang mipui thawhkhawm atangin tanpuina engemaw zat an hlan nghal a ni.

 

Ni 7.5.2020 Ningani:

Phullen Vengthar Kohhranin, an Kohhran member Pi Vanlalchhuangi, Hermon veng Phullen chu an chenna In a that tawh loh avangin In thar an sak sak. Insakna hmanrua leh sensate hi Kohhran sum leh mi thahnemngaite thawhkhawm atanga lei a ni a, In sak hna hi May ni 6, 2020-ah tan niin May ni 7, 2020 hian sak zawh a ni.

 

Ni 11.5.2020 Thawhtanni:

May ni 11, 2020 Thawhtanni hian Feh kawng rih a ni a. He hunah hian Phullena Lo leh Huan nei mi thahnem tak an thawk chhuak a ni. Kumin atana thlawhhma neihna hi Kingpuimual lam a ni.

 

Ni 14.5.2020 Ningani:

Hemi ni hian, India Prime Minister chuan Covid-19 avanga Lockdown chu May ni 3, 2020 thleng pawh sei a nih thu a puan avangin, VLTF Phullen leh Phullen Branch YMA tangkawp chuan hetiang hian Covid-19 vanga khawtlang inawpna an duan, thenkhat chu an sawifiah nawn:

1. Tuna kan kal mek angin In lam leh ram lamah hnathawh chhunzawm theih a ni a, hlawhfa pawh mahni mamawh zat chhawr theih a ni ang a, punkhawmna chi – Kaichhan sawm leh a huhova (pawlho) inhlawhna lam erawh phal a ala ni rih lo.

 

6. Lockdown chhungin heng hunahte hian dawr hawn thin a ni ang. Thawhtan, Nilaini, Zirtawpni leh Inrinniah te, zingkarah dar 8:00 am thleng hawn phal a ni.

 

Ni 22.5.2020 Zirtawpni:

May ni 22, 2020 hian Salvation Army, Phullen Bial Commanding Officer (C.O) thar Lieut. VL.Chhanchhuahi d/o Maj. Lalbiaktluanga & Maj. Aichhungi chuan a awmna tur Phullen a rawn thleng.

 

Ni 23.5.2020 Inrinni:

Covid-19 avanga Lockdown chu Sawrkarin a thlahdul hret avangin, Phullen LTF ten kawtchhuah hmun hniha duty an indah thin chu titawpin, Diakkawn-ah chauh Duty siam a ni ta a. Zingkar atanga zan dar 10:00  thleng an duty thin. 

 

Ni 31.5.2020 Pathianni:

May ni 5, 2020 Pathianni hian, Phullen School Staff Union (PSSU) chuan National High School, Phullen atanga HSLC Pass thar te lawmpuina Citation a hlan a.  Hrileng avanga pun khawm a rem loh avangin Citation hi Pass tharte Inah kalin an hlan a ni.

 

 

 

JUNE 2020

 

Ni 3.6.2020 Nilaini:

June ni 3, 2020 chawhma dar 11:40-ah Pu Malsawmdawngzela, kum 29, s/o Pu Ramnghahliana Phullen Ar Farm veng chu nat lawkna pawh nei lovin a thi. Thalai a nih bakah, Kohhran leh khawtlanga mi inhmang tak a ni a, uitu a ngah hle.

 

Ni 4.6.2020 Ningani:

Covid-19 laka Phullen khawtlang himna turin June ni 4, 2020 Ningani zan a\angin VLTD leh YMA tangkawp chuan uluk zawkin kawtchhuah – New Khandaih-ah duty an kalpui leh tan.

 

Ni 15.6.2020 Thawhtanni:

Hemi ni hi YMA Day vawi 85-na a ni a. Covid-19 hripui karah fimkhur takin YMA day hi tualchhung Kawngpui chei that hun atan hman a ni a. Tuidam kawn leh YMA ram inkar kawngpui chei that niin, mi 300 an thawk chhuak a, Lirthei (Hnathawk thei chi) thahnem tak an thawk chhuak bawk. YMA Day pual hian YMA chuan Phullen PHC a Poor Fund atan leh mimal chhungkua pakhat hnenah tanpuina pawisa an pe.

 

Ni 27.06.2020, Inrinni:   

H hian Phullen Sanitation Committee member-te Khaw chhung thianfaiin nilengin an hnatlang.

 

Ni 23.6.2020 Thawhlehni:

Hemi ni hian VLTF Phullen leh YMA Phullen Branch tangkawp chuan, Phullen khawtlang hmingin Zarkawt khawtlang hnenah Thlai thar chi hrang hrang Pick-Up 3 phur a pe. Covid-19 avanga lockdown te kalpui a nih avangin khawpuia lamah chawhmeh tur Thlai thar avang a. Hei vang hian thing tlang khaw hrang hrangin Aizawl veng hrang hrang te chawhmeh an pe thin a. Chutiang zinga chawhmeh la dawng lo veng Zarkawt chu thlangin Phullen khawtlang chuan thlai thar a pe a ni.

 

 

JULY 2020

 

Ni 3.7.2020 Zirtawpni:

MRB Phullen Branch a Manager fak hlawh tak Pu Vanlalhruaia chu West Phaileng-ah sawn niin, hemi ni hian Pullen chu a chhuahsan. Hetih rual hian MRB Phullen Branch Manager thar Pu B. Lalchhanchhuaha leh Cashier thar Tv. Lalchhuanawma Renthlei ten an hna an zawm ve bawk.

 

Ni 6.7.2020 Thawhtanni:

Hemi ni hi MHIP Day a ni a. MHIP member ten thingphurh hnatlang an nei a, mi 266 ten thing leh pawisa thahnemtak an thawh khawm a ni. Heng kan thing keuh khawmte leh pawisa te hi a mamawh te hnenah an pe chhuak thin a ni.

 

Ni 15.7.2020 Nilaini:

Hemi ni hi Phullen Branch YMA din champha (Branch Day) vawi 75-na a ni a.  Hemi pual hian YMA Member-te YMA Ram samfaiin zingkarah an hnatlang a, member 60 an thawk chhuak.

 

Ni 15.7.2020 Nilaini:

Hemi ni hian Tuivai Group YMA kal tlanga Saitual DC-in Covid 19 pual mipahnih tana tanpuina a pek chu YMA ten Pi Kawlkhumi leh Tv. Biaksawma-te hnenah hlan a ni.

 

Ni 18.7.2020 Inrinni:

Hemi ni hian Phullen Consumer Cooperative Society-te chuan, Phullen Community Hall, Diakkawn-ah Assembly vawi 30-na an hmang.

 

Ni 19.7.2020 Pathianni:

He ni chawhnu hian, Phullen School Staff Union (PSSU) te chuan Phullen khua a HSSLC Pass thar te lawmpuina hun an hmang. He hunah hian PSSU Comt member te, pass thar te leh an zirtirtu te an kal.

 

NI 21.7.2020 Thawhlehni:

Ni 21.7.2020 Thawhlehni hian, Phullen BDO Pu Lalrinawma Khiangte MCS chuan, Phullen khaw mi kumin 2020-a HSSLC Pass thar te lawmpuina hun, BDO Complex-ah a hmanpui. BDO hian Pass thar te lawmpuina leh fuihna thu bakah, Lawmpuina tha tak a hlan a ni.

 

Ni 26.7.2020 Pathianni:

Hemi ni hian Community Hall-ah Phullen Student Union Aizawl (PSUA) chuan, an member HSLC leh HSSLC pass tharte lawmpuina hun a hmang.

 

Ni 27.7.2020 Thawhtanni:

Hemi ni hian, Phullen khaw chhunga Contract hna thawh hrang hrang te a hmunah enpuiin, Phullen Branch YMA hruaituten an tlawh kual.  Hnathawktu te chu titi puiin, a theih chinah a tha thei ang bera thawk tur leh khawtlang tana thahnemngai taka thawk tura an beisei thute an sawipui a ni.

 

 

AUGUST, 2020

 

Ni 1.8.2020 Inrinni:

Hemi ni hian Phullen Community Hall-ah Joint Prohibition Committee (JPC) Phullen General Body meeting neih a ni a. Fuihna thu te leh JPC hmalakna hrang hrang report ngaihthlak a ni a. He hunah hian kum 2019 JPC Phullen hruaitute leh kum 2020 JPC hruaituten Mawhphurhna an inhlan. JPC hruaitu tharte hi Formation Committee-in July ni 1, 2020-a a lo siam tawhte an ni. He hunah hian khawtlang hruaitu pawimawh tak tak an tel kim hle.

 

Ni 2.8.2020 Pathianni:

Hemi ni hian Phullen-ah pawl thar din a ni a, Phullena puanthui thiam awmte chuan Phullen Puanthui Association an din.  Hetiang hian hruaitu an inseam nghal:

 

President       :         Pu C.Lalremliana

Secretary      :         Pi F.Lallawmsangi

Treasurer      :         Nl Lalrinliani

Fin.Secy        :         Nl. Ramniengmawii

 

 

Ni 14.8.2020 Zirtawpni:

Hemi ni chawhnu dar 1:05 pm khan, Pu H. Zamliana, kum - 77 h/o Pi Lawmpuii, Phullen Farkawn veng chu Thawhah vangin a thi. Hemi ni hian Phullen thlanmualah vui liam nghal a ni.

Ni 27.8.2020 Ningani:

Hemi ni hian Mizoram pumah Village Council leh Local Council thlan a ni a, Phullen-ah pawh VC seat 5 (General seat 4 leh Reserve seat 1) awmin inthlan hi tluang takin Community Hall-ah neih a ni a. He inthlanah hian mi 1133 (mipa 565 leh hmeichhia 568) ten vote an thlak a, vote tla hi za zelah 77.76 % niin, kum 2015 VC inthlan a vote tla 75.11 % aiin 2.65% in vote a tla tha zawk a ni. Inthlan hi kil thum atanga chuhin, Congress leh BJP tangdun leh MNF leh ZPM ten an chuh a. MNF chu chakin hengte hi kum 2021-2025 chhunga Phullen VC tura thlan chhuahte chu an ni:

 

1. Pu Lalzikpuia                 -         MNF   Vote    -         604    

2. Pu Vanzairemmawia       -         MNF   Vote    -         563

3. Pu Zoramhmangaiha      -         MNF   Vote    -         505

4. Pu B.Lalhriatpuia -         INC     Vote    -         478

5. Pi F.Lalchhandami         -         MNF   Vote    -         559

 

Ni 28.8.2020 Zirtawpni:

Hemi zan hian, Lenkhawpui Whatsapp Group Administrators te chuan, Lenkhawpui Whatsapp Group huaihawta mi inphalte thawh khawm atanga lei Oxygen Concentrator chu khawtlang mipui, a mamawh apiangte hman theih turin YMA kutah hlan a ni. He khawl hi Rs 55000/- man a ni a, group member te thawhkhawmin a daih loh avangin MNF Phullen Unit atangin Rs 20000/- leh Phullen Branch YMA atangin Rs 2000 thawh belh a ni bawk.

 

 

 

SEPTEMBER, 2020

 

Ni 2.9.2020 Nilaini:

Ni 2.9.2020 Nilaini hian Phullen tualchhung inawpnaa thuneitu sang ber Phullen Village Council chu siam niin, MNF Party ticket-a tling te chuan sawrkarna an siam a. Hemi ni hian Phullen Village Council thlan tharte hian mawhphurhna la nghalin, Secretary leh Tlangau ruat nghal a ni a. An chanvo chelh dan chu hetiang hi a ni:

 

President                 :         Pu Vanzairemmawia

Vice President          :         Pu Lalzikpuia

Secretary                :         Pu Malsawmhlua

Treasurer                :         Pu Zoramhmangaiha

Members                 :         Pu B.Lalhriatpuia

                                        Pi F.Lalchhandami.

Tlangau                  :         Pu Zoramthanga

 

 

Ni 7.9.2020 Thawhtanni:

Hemi zan hian Mizoram Peoples Forum (MPF) Phullen huaihawtin, Phullen Kohhran Hall-ah, Phullen Village Council member tharte leh MPF te chu, Phullen khawtlanga rorelna tha a awm theih nan inkawmhona an nei. MPF Phullen Chairman Rev. Lalbiaknungan a kaihruai a, Rev. MS Dawngliana’n VC thlan tharte pualin fuihna thuchah leh tawngtaisakna hun a hmang a, inpawh tlang takin hun an hmang ho.

 

Ni 9.9.2020 Nilaini:

Hemi ni hian BDO office-ah Phullen tualchhunga sawrkar office-a thawktu mi pawimawh tak tak te leh tualchhunga pawl hrang hrang hruaitu ten Joint Meeting an nei. He meeting hian tualchhung inawpna hrang hrang te leh sawrkar kalphung chungchang te, covid-19 hri leng kara khawtlang inawpna dan chungchang te, khawtlang hmasawnna kawnga mamawh hrang hrangte an sawiho a. Meeting hi BDO Pu Lalrinawma Khiangte MCS in a kaihruai a, officials te leh VC, NGOs hrang hrang hruaitute an tel tha hle.

 

Ni 12.9.2020 Inrinni:

Hemi ni hian, tualchhunga Ni 100 inhlawhna (MGNREGS) tha taka kalpui a nih theih nana VC te tawiawmtu tur Village Employment Council (VEC) thar siam a ni a. Hengte hi VEC member tharte an ni:

 

Chairman                :         Pu Vanzairemmawia

Vice Chairman         :         Pu B. Lalruatkima

Secretary                :         Pu PC. Malsawmhlua

Asst. Secretary        :         Pu C. Lalremliana

Treasurer                :         Pu Zoramhmangaiha

Fin. Secretary          :         Nl. V. Lalrammawii

Members te             :         Pu Lalzikpuia

                                        Pu B. Lalhriatpuia

                                        Pi F. Lalchhandami

 

Ni 14.9.2020 Thawhtanni:

Hemi ni, zing dar 9:40 a.m khan Pu Ropianga kum 88, Phullen Mautui veng chu nat lawk em em awm lovin a thi. Ni 14.9.2020 hian vui liam nghal a ni.

 

Ni 21.9.2020 Thawhtanni:

September ni 21 khan kum 2021 chhunga Tlangram lo tur ram theh a ni a, Lo nei tur ten Lo an thlang. He hun hi Mipa Day tiin tualchhungah chuan sawi a ni thin. Lo thlang turte hian Lo number an pawt hmasa a, chhungkaw 213 –in Lo number hi an pawt a. Tlawmngaiin, mi 8 ten Lo hi a leiin an lei a, Lo leitute hian an thlang hmasa thin. Kum 2021 Lo tura ram theh chin chu – Aikawn lam, Tuihnem chung, Minpuiruam leh Dengsur ram te a ni.

 

 

OCTOBER, 2020

 

Ni 2.10.2020 Zirtawpni:

Ni 2.10.2020 tuk hian, a hma zana ruah sur avangin Phullen tualchhung hmun engemaw zatah Leimin leh lei tlahniam tenau a awm nual a. VC chuan JCB hmangin kawng ko leiminin kawng a tih hnawk te hi an thianfai hlawm a. Hemi ni pawh hian ruah a sur deuh reng a, a hma ni a che lo nia hriat, Diakkawn tawntirh Phullen to Saitual (Aizawl) kawngpui PWD road lei tlahniam ṭhin chu hemi ni chhun lamah hian a tlahniam leh hret hret a. Vawi leh khata tla thut lovin, nilengin a che hret hret ni a sawi a ni a, tlai thim dawnah chuan meter 10 vel a thuiin a tlahniam a ni.

 

Ni 4.10.2020 Pathianni:

Hemi ni hian, Diakkawn chhim lam, kawngpui an a Games & Sport Association (GSA) Phullen office chu, a thlang lei a min avangin zingkar atangin hnatlangin thiah a ni. Diakkawn tawntirh Lei tlahniam pawh a tlak hniam belh leh a, a bul lawka awm Pi Lalchhungi (w/o Pu Vanlalthanga) In chu a him loh avangin, bungrua thiar chhuah a ni. Zan lamah Lei tlahniam hnuai lam atangin thil puak ri an hre zauh zauh a, chu chuan nunau a tiralkhel deuh a, a bul hnaia awm chhungkaw 5 vel chu hmun him lamah an riak chhuak.

 

Ni 5.10.2020 Thawhtanni:

A hma zanah Lei tlahniam atangin thil puak ri an hriat deuh reng avangin, zingkarah lei tlahniam velah mi an pungkhawm tam hle a. Thil puak ri an hriat hi, lei tawlh hnuai lama Raw hung awm puak keh ri nia hriat a ni. Phullen to Saitual kawngpui chu Lei tlahniam chuan a tawlh hniam pui belh nasa hle a, a chhak lawka Kawngpui awm (by-pass road) pawh feet 2 vel zetin a tlahniam a.

 

Zingkarah Phullen Community Hall tual zawlah Phullen BDP Pu Lalrinawma Khiangte hovin Vantlang inkhawm neih a ni a. Phullen khawtlanga chhiatna thleng chungchang sawiho a ni a, hmalak dan tur an rel nghal a. He hunah hian VC te, YMA hruaitu te leh khawtlang mi pawimawh thahnem tak an tel. 

 

Chhunah, In tin atanga mi pakhat thawkchhuakin hnatlang neih a ni a.  Lei tlahniam a tuihawk luanglut tur hmun danga luan tir te, Lei tlahniam leh a chheh vel Silpouline a khuah te leh Phullen Kohhran Biak In, hmar lam hrula kawng kal chu Lei tlahniam helna (by-pass road) atan siam that a ni bawk.

 

Ni 6.10.2020 Thawhlehni:

Hemi ni hian VC-te leh YMA hruaitu te, ruah sur avanga Phullen tualchhung inkalpawhna kawnga lei tlahnawkte thianin nilengin an hnatlang.

 

Ni 7.10.2020 Nilaini:

Hemi ni hian, VC leh YMA Committee-te leitlahniam helna kawng cheitha leh Bethlehem Venga tuihawk paihna siamthain an hnatlang leh a. Phullen Kohhran Biak In ven hna thawkin Kohhran hote leitlahniamah nileng hnatlang an nei.

 

Ni 13.10.2020 Thawhlehni:

Hemi ni hian Bialtu MLA (Speaker) Pu Lalrinliana Sailo chu Phullen-ah lo kalin, October thla tir lama leitlahniamin kan khawtlang a tih chhiat dante a hmunah a en a. Community Hall-ah Phullen BDO Pu Lalrinawma Khiangte kaihhruainain vantlang inkhawm tawi neih a ni. Speaker hi DDMA, DM&R, PWD leh Geology & Mineral Resources atanga official thahnem tak - Pu VL Hruaizela Khiangte, Saitual Bawrhsap, Pu Vanlalchhuana, SE, Eastern Circle, PWD, Pu Lalrinawma Traite, Joint Director, DM&R, Pu H. Lalbiakkima, Joint Director, G&MR, Pu Lalchungnunga, EE, PWD, Saitual leh official dang ten an rawn tawiawm a. Speaker zuitu  Geologist te hian lei tawlh hi an zirchiang nghal a ni.

 

Ni 14.10.2020 Nilaini:

Hemi ni hian Saitual Welfare Committee chuan Phullen khuain khuarel chhiatna kan tawh avanga tanpuina pawisa tam tham tak Rs 31700/- lai mai Phullen khawtlang tan an pe a. He tanpuina hi Aizawl Press Club-ah hlan niin, Phullen khawtlang aiawhin Phullen & Thanglailung Welfare Aizawl hruaituten an dawng. 

Ni 17.10.2020 Inrinni:

Phullen-ah mimal tan a vawi khat na turin Tui connection (Private connection) pek chhuah mek a ni a, Phullen vengthar lam atanga pek tan a ni. Hriat theih chinan, Tui connection (private) pek tur hi chhungkaw 415 an ni a, heng bak te pawh hi la awm zel tura ngaih a ni. Tui connection lakna senso za zela panga (5%) chu mimal tum ve tur a ni a, chumi atan chuan Pipe phumna tur laih a ni a, a taka pawisa sen ngai lovin pipe phumna tur lo laih tur a ni.

 

 

NOVEMBER, 2020

 

Ni 6.11.2020 Zirtawpni:

Hemi ni, zing dar 6:40 a.m.-ah Tv. Vanlalhmangaihsanga, kum 20, Pu HS. Lalramsanga leh Pi Ramluahsangi te fapa, Mautui Veng Phullen chu Aizawl Civil Hospital-ah Ril TB avangin a boral. A ruang hi Phullen-ah phurh haw niin, hemi ni hian vui liam nghal a ni.

 

Ni 9.11.2020 Thawhtanni:

Hemi ni hian Phullen Diakkawn tawntirh PWD kawngpui tlahniam chhaka tualchhung inkalpawhna kawngpui awm, leitlahniam vanga feet 2 vel a tlahniam ve chu, Motor kal theihin VC ten an siam tha.

 

Ni 11.11.2020 Nilaini:

Hemi ni hian Phullen Diakkawn tawntirh lei tlahniam chu, JCB hmanga siam remin, two wheeler kal theiha siam a ni.

 

Ni 14.11.2020 Inrinni:

Hemi ni hian, Phullen leh Thanglailung tui lakna khawl Tuivawl pump line-ah electric current kal tir tan a ni.

 

Ni 21.11.2020 Inrinni:

Hemi ni a Lentlang Chanchinbu-in a tarlan danin, kum 2020 chhunga Phullen a Tlangram lo atanga Buh thar tam, Phur 100 thlar tling chinte chu hengte hi an ni:

          1. Pu Rosanga                   -         Phur  150

          2. Pu C.Dailova                  -         Phur  150

          3. Pu Lalsanga                   -         Phur  140

          4. Pu F.Vanlalsanga -         Phur  127

          5. Pu F.Aichhunga             -         Phur  120

          6. Pu C.Vanlalruata           -         Phur  105

          7. Pu Ramthianghlima       -         Phur  104

          8. Pu B.Thanmawia           -         Phur  102

          9. Pu Zoramthara              -         Phur  100

          10. Pu Lalsailova                -         Phur  100

          11.Pu Zonunsanga            -         Phur  100

 

 

Ni 15.11.2020  Pathianni:

Hemi ni, tlai dar 6:15 p.m khan, Pu H. Lalnghenga, Kum 87 w/o Pi Lalnangi (L) Phullen chu Zun kawng thalo avangin Phullen-ah a thi.  He mi zan hian tlaivarpui niin, a tuk Ni 16.11.2020 dar 8:00 a.m. ah, Khandaih thlanmual-ah vui liam  a ni.

 

Ni 28.11.2020 Inrinni:

Hemi zan hian Phullen Village Local Task Force (on covid-19) hruaitute leh Phullen kawtlanga Kohhran hrang hrang atanga aiawh kalkhawm (Joint Committee) ten chu, kum 2020 Krismas leh Kumthar chungchangah an inhmu khawm a. Hetiang hian Krismas leh Kumthar hman dan tur an rel:

1. Phullen khawchhunga COVID-19 hrileng laka kan lo him zawk theih nan "Kum 2020 krismas leh kumthar lo thleng tur pualin a lawmna eng ruai mah buatsaih loh nise," tih chu lungrual takin kohhran hrang hrang ten an pawm.

2. Phullen khawchhungah khawi veng mahin veng bilin krismas leh kumthar ruai eng chi mah buatsaih loh tur a ni.

3. Krismas leh Kumthar pualin 24th December 2020 atanga 1stJan. 2021 kumthar pualin, Kohhran hrang hrang atangin VLTF-kaihhruaina in Pathian thuchah puanchhuahna leh mimal zaia rawngbawlna hun buatsaih tum a ni.

 

Ni 28.11.2020 Inrinni:

Hemi ni hian Community Hall-ah Phullen Mistiri Association (PMA) chuan Phullen khawtlangin kan hman tur Kuang an siam. PMA member hi 25 an thawk chhuak a, Kuang hi, hmanruain a daih tawk, pasarih (7) an siam. Kuang siamna hmanrua hi mipuite atanga khawn khawm Chhiatni Fund atanga lei a ni.

 

Ni 29.11.2020 Pathianni:

Phullen Local Task Force on Covid-19 chuan thuchhuah siamin, November ni 29, 2020 Pathianni chawhnu dar 2:30 atangin, Megistrate hriatpuinain Phullen khaw chhungah Partial Lockdown kalpui a ni. Dawr pawh zing dar 6:00 atanga zing dar 9:00 thleng chauh hawn phal a ni a, Krismas hmanga Phullen pan turte tan December ni 15 thleng hun hawn a ni a, a hnu lamah chuan fuahmanna dang siam leh tur a ni. Covid-19 hrileng laka fimkhur zual ngaihna a awm avang a ni.

 

 

 

DECEMBER, 2020

 

Ni 14.12.2020 Thawhtanni:

Hemi zan dar 7:00 hian Phullen Community Hall, Diakkawnah kum 2021 chhunga Phullen Branch YMA hruaitu Office Bearers (O.B) turte thlan a ni a. Inthlan hi VC ten kaihhruaiin VCP Pu Vanzairemmawia chu Returning Officer a ni a. Heng mite hi YMA Phullen Branch 2021 hruaitu tura thlan chhuahte an ni:

 

President                 :         Pu Lalruatsanga Pautu

Vice President          :         Pu Lalchhuanawma

Secretary                :         Pu Lalhruaikima Tochhawng

Asst. Secretary        :         Pu Lalkrosschhuanga

Treasurer                :         Pu Lalhmingliana

Finance Secretary    :         Pu Zoramhluna

 

 

Ni 25.12.2020 Zirtawpni:

Hemi ni hi Krismas ni a ni a, kum dangah chuan Phullen khawtlanga Kohhran hrang hrang ten ropui takin an lawm thin a, mahse kumin bikah chuan Covid-19 hrileng avangin inkhawm te a rem lo va. Chuvangin Krismas pawh hi Biak Ina inkhawm leh ruai nena lawm a theih ta lo va, mahni inah mahni remchan dan ang angina lawm a ni ta a ni. Hei hi kum tam tak hnua Krismas ni, Kohhran hoten a huhova kan lawm theih loh hmasa a ni mai awm e.

 

 

Ni 31.12.2020 Ningani:

Hemi ni hi kum 2020 chhunga ni hnuhnung ber a ni a. Kum dangah chuan kum hlui thlah tur thawm leh kumthar hmuak tur thawmin khawtlang a fan hneh hle thin a. Kuminah erawh Covid-19 hrileng avangin puipunna lam chi engmah huaihawt theih a ni lo va. Kohhran programme pawimawh zual, kum 2020 chhunga Chatuan ram pan ta te sunna hun inkhawm erawh, zanah Kohhran hoten an huaihawt a, chutah pawh chuan tel thei zat tur biktuk thlap a ni.

 

 

 

 

 

 

 

 

 

 

KUM 2020 CHHUNGA PHULLEN KHAWTLANG HRUAITU THENKHATTE

 

 

PHULLEN VILLAGE COUNCIL

(Upto 2.9.2020)

 

President                 :         Pu B. Lalhriatpuia

Vice President          :         Pu H. Lalhruaikima

Secretary                :         Pu PC Lalhmachhuana

Treasurer                :         Pi H. Lalsawmliani

Members                 :         Pu C. Lalziakkima

                                        Pu J. Remsiama

Tlangau                  :         Pu Ramsanga

 

 

PHULLEN VILLAGE COUNCIL

(From 2.9.2020)

 

President                 :         Pu Vanzairemmawia

Vice President          :         Pu Lalzikpuia

Secretary                :         Pu Malsawmhlua

Treasurer                :         Pu Zoramhmangaiha

Members                 :         Pu B.Lalhriatpuia

                                        Pi F.Lalchhandami.

Tlangau                  :         Pu Zoramthanga

 

 

PHULLEN BRANCH YMA HRUAITUTE 2020

 

President                 :         Pu J.Pachhunga

Vice President          :         Tv. Imanuel Lalchhunawma

Secretary                :         Pu Lalruatsanga Pautu      

Asst. Secretary        :         Pu Lalhruaikima Tochhawng

Treasurer                :         Pu Lalhmingliana

Fin. Secretary          :         Pu Zoramhluna

 

 

PHULLEN BRANCH MHIP HRUAITUTE 2020

 

President                 :         Pi Lalneihsangi

Vice President          :         Pi Zoramengi

Secretary                :         Pi B.Lalnunhlimi

Asst. Secretary        :         Pi Ramengmawii

Treasurer                :         PiLalchungnungi

Fin. Secretary          :         Pi Lalduhveli

 

 

 

MIZORAM UPA PAWL PHULLEN UNIT HRUAITUTE 2020

 

President                 : Zoramnuara                   

Vice President          : R. Lalnunmawia

Secretary                : H. Lalhnghinglova 

Asst. Secretary        : Ngurdailova

Treasurer                : Lalhnehzauva       

Fin. Secretary          : A. Zorama  

 

 

JOINT PROHIBITION COMMITTEE (JPC) HRUAITUTE 2020

 

Chairman                :   Pu B. Lalrochhuanga

Vice Chairman         :   Pu KC Zahmingthanga

Secretary                :   Pu F. Lalruatkima

Asst. Secretary        :   Pu Lalkrosschhuanga

Treasurer                :   Pu Lalnunthara

Fin. Secretary          :   Pu Lalhmingliana

Info. Secretary         :   Pu B.Vanlallawma

                              :   Pu Lalhmingthanga

 

 

VDP PHULLEN OFFICE BEARERS 2020

 

Chairman                :   Pu PB.Lungmuana

Vice Chairman         :   Pu B.Lalrochhuanga

Secretary                :   Pu Lalrinchianga

Asst. Secretary        :   Pu BT.Lalhruaitluanga

Treasurer                :   Pu K.Laldinthara

Fin. Secretary          :   Pu Lalawmawia

 

 

PHULLEN SANITATION COMMITTEE 2020 OFFICE BEARERS

 

Chairman                :   Pu  Ramnghahliana        

Vice Chairman         :   Pu K.Vanlalnghaka

Secretary                :   Tv PK.Lalsangliana

Asst. Secretary        :   Pu Zoramhluna

Treasurer                :   Pu B.Lallianzuala

Fin. Secretary          :   Pu Sanghluna

 

 

ANIMAL CONTROL BOARD PHULLEN 2020 OFFICE BEARERS

 

Chairman                :   Pu Lalramchhuana         

Vice Chairman         :   Pu F.Vanlalsawia

Secretary                :   Pu C.Vanlalruata

Asst.Secy                :   Pu Zohmingthanga

Treasurer                :   Pu B.Lalruatkima

Fin. Secy                 :   Pu Vanlalchianga

 

PHULLEN MISTIRI ASSOCIATION 2020 HRUAITUTE

 

President                 :         Pu Lalpana

Vice President          :         Pu Vanlaldika

Secretary                :         Pu B.Lalhmingsanga

Asst. Secretary        :         Pu H.Lalsangliana

Treasurer                :         Pu R.Vanlallawma

Fin. Secretary          :         Pu Laldinthara Khiangte

 

 

PHULLEN VOLLEYBALL ASSOCIATION 2020 HRUAITUTE

 

President                 :  Pu Vanlalzuia

Sr.Vice President     :  Pu Lalhuma Ralte

Vice President          :  Pu H.Zosangzuala

Secretary                :  Pu H.Lalrinsanga

Asst.Secy                :  Pu Lalremchhunga

Joint.Secy               :  Tv.R.Lallawmawma

Treasurer                :  Nl.Laltanpuii pautu

Fin.Secy                  :  Pu H.Lallawmkima

 

 

PHULLEN DRIVERS’ UNION 2020 HRUAITUTE

 

 

President                 :         Pu Lalhmingliana

Vice President          :         Pu PB. Lalthazela

Secretary                :         Pu PC. Lallawmzuala

Asst. Secretary        :         Pu B. Vanlallawma

Treasurer                :         Pu Lalnunthara

Fin. Secretary          :         Pu C. Vanrammawia

 

 

PHULLEN BADMINTON CLUB 2020 HRUAITUTE

 

President                 :         Pu Malsawmdawngkima

Vice President          :         Pu F.Thansanga

Secretary                :         Pu Vanlalzuia

Asst. Secretary        :         Tv.PK.Lalsangliana

Treasurer                :         Pu F.Lalthlenkima

Fin. Secretary          :         Pu F.Lalruatkima

 

 

 

PHULLEN & THANGLAILUNG WELFARE AIZAWL 2020-22 HRUAITUTE

 

Chairman                :         Pu Lalrammawia                Ramhlun ‘N’

Sr.Vice Chairman    :         Pu Lalbiakdanga                Ramhlun ‘S’

Pu C.Lalbiakliana               Saron Veng

Pu R.Lalrohlua                  Thakthing veng

Vice Chairman         :         Pu R.Kapkhuma                Dawrpui Vengthar

Secretary                :         Pu Lalbuatsaiha                 Tuikhuahtlang

Asst.Secretary         :         Tv.Lallawmawm                 Dawrpui

Treasurer                :         Pu K.Lalhmachhuana        Ramthar Veng

Fin. Secretary          :         Tv.PC.Ramdinthara Armed Veng

Joint. Secretary       :         Tv.J.Lalnunzira                 Tuithiang

                                        Pu C.Lalzarmawia              Ramhlun Vengthar

                                        Pu J.Lalhruaisanga            Venghlui

 

 

 

Kum 2020 a Phullen Branch YMA Member dinhmun hetiang hi a ni:

Mipa                       :         690

Hmeichhia               :         232

                    Total   :         922 

 

 

 *************************************