JPC PHULLEN DIN A NIH DAN LEH CHANCHIN TAWI

 

Kum 1986 bawr vel khan kan, khaw dang tam tak ang thovin kan khua Phullen-ah pawh Zu a zalen angreng hle a nih kha. Chu chu khawtlang hruaituten tha an ti lo hle a.  

Zu khap duhna chu a zual zel a, Kohhran hruaitu atang te leh mi dang dang atangin Zu khap tura rawtna a awm thin a. Khatih laia Phullena Pastor awm (Presbyterian) kan khaw pa Rev. Chanchinmawia phei kha chu thahnem a ngai zual hle a. Khawtlang hruaitute pawh Zu khap chungchangah an thu a inhmu tlang hle a. Mahse, mipui an hmin thei vek dawn em tih a hriat loh avangin bul han tan mai kha a awlai lem lo.

Chutiang a nih lai chuan, kan khuaa pawl lian ber YMA kha, khatih laia President Tv Lalthanpuia hovin an tang hle bawk a, VC hnenah, "Keini YMA tan mipui koh khawm a rem lo va, VC in Public Meeting ko ula, mipui chu kan hmin thei mai ang" tiin VC hnenah rawtna an thlen a. 

Tichuan ni 2.6.1987 Thawhlehni zanah Pu Khuanga Sikul (Phullen Middle School-I ah Public Meeting chu koh a ni ta a. VCP  Pu Ralthuama chuan mipui inkhawm chu a kaihruai a, VC Secretary Tv Dengmawia chu an thu rel ziaka chhinchhiahtu a ni a. 

Phullen chu Dry Village a puan rawtna chu mipui pungkhawm hmaah chuan an pharh ta a. An sawiho nak nak a, Zu khap bur tul ti lo pawh an awm nawk a, thenkhat chuan, "Zu kan khap chuan kan buai hle ang, Thisen te pawh a luang hial thei ang" ti te pawh an awm a. Mahse kan khawtlang hruaitute chuan, khawtlang tana tha tur a nih chuan, tawrh pawh ngai se kan tuar mai tur a ni an ti ve bawk a. A tam zawkin Dry Village chu an thlawp bawk avangin rei tak pawh sawi a ngai lo a ni awm e. Tichuan, ni 2.6.1987 Thawhlehni zan chuan Phullen chu Zu zuar leh Zu in awm lohna hmun Dry Village ah puan a ni ta a ni.

Zu zuar leh zu in awm lohna tura khawtlang enkawl chu a awlai lo hle a. Khawtlang inkaihhruaina dan thar duan a ni a. Pawl hrang hrang - YMA, MHIP, MUP, GSA, Kohhran leh sawrkar Dept hrang hrangte chuan, "Hetiang hian JPC dan bawhchhia te chungah kan pawlin action kan lo la ve ang e," tiin VC hnenah an thehlut sap sap a. Chutiangchu lakhawmin khawtlang inkaihhruaina dan chu siam a ni ta a. Dry Village duhna a sang bawk a, Inkaihhruaina Dan pawh a khauh hle. 

Dry Village inkaihhruaina dan chu a kengkawhtu tur Joint Action Committee (tuna JPC ni ta hi) siam a ni a. JPC (JAC) ah hian tualchhung pawl hrang hrang aiawh an tel kim hle.  

*Phullen JAC (JPC) hruaitu hmasa ber (kum 1987-1988 ) te chu hengte hi an ni:* 

Pu Ralthuama   Chairman

Pu Fimthangrila  Vice Chairman

Pu K.Zaithuama Secretary

Tv. Lalthanpuia  Jt Secretary

Pu F.Lalramliana Treasurer

Pu Kapkunga Fin. Secretary

JPC Committee hmasa ber te:

1. Pu K.Thanhlira 

2. Pu Rozika

3. Pu Rinzama

4. Pu Lalhnehzauva

5. Pu Ramzauva

6. Tv. Sangtawna

7. Tv. Lalrinmawia

8. Pu Rinenga

9. Tv. Lalthawmliana

10. Pu Lianthangpuia

11. Pu Thanliana

Kan khua Dry Village a puan a nih theih nan hian VC, NGOs, Kohhran te an thawkho tha hle a, an zara Dry Village ni thei hi kan ni.  Khatih laia kan khawtlang hruaitu VC te chu hengte hi an ni.:

1. Pu Ralthuama  - President

2. Pu Rosela - Vice President

3. Pu Dengmawia - Secretary 

Member:

1. Pu R. Kapkhuma

2. Pu Zothangthuama

3. Pu Lalchhuailova

4. Pu Rengluta 

#Hemi term VC Vice President Pu Rosela hi sawrkar hna a thawh tak avangin Pu R.Kapkhuma chu Vice President a ni. 

*Dry Village puan kawnga thawhhlawk em em YMA Phullen Branch, khatih laia hruaitute:*

1. Tv. Lalthanpuia  - President

2. Pu Vanlaldika - Vice President

3. Pu J.Pachhunga - Secretary

4. Pu KC Zahmingthanga - Asst Secy

5. Pu Lallawma - Treasurer

6. Tv. T. Lalchhuanvawra - Fin. Secy

Zawi zawiin Zu chu man a ni zel a, ruihlo dang pawh khap bur vek a ni a. A hautak ve hle a, kum khat vel hnuah Pastor Chanchinmawia rawtna angin khawtlang hruaitute chuan JAC chu JPC tiin a hming an thlak ta a. 

Khawtlang hruaitute, JPC te thahnemngaihna zarah Dry Village chu kum 30 chuang kalpui a lo ni ta a, a lawmawm hle. JPC dintute leh JPC hruaitu lo ni tawh zawng zawng te, an hnathawh kan ngaihlu a, kan chhuangin kan ngaisang tak zet a ni.

Vawiina JPC mawhphurhna latu JPC hruaitu tharte, khawtlang mipui ten kan thlawp tlat che u a. Pathianin a awmpui che u anga,  tluang taka khawtlang inkaihhruai theih nan duhsakna kan hlan a che u.

Buata Bawihtlung

Dt 3.8.2021